ຕາມຂ່າວສານຊິນຮວາ: ທ່ານ ເຣັກສ໌ ຕິເລີຊັນ ລັດຖະມົນຕີກະຊວງການຕ່າງປະເທດອາເມລິກາ ໄດ້ຮຽກຮ້ອງໃຫ້ບັນດາປະເທດໃນອາຊຽນ ຈົ່ງກົດດັນດ້ານເສດຖະກິດແລະການຕ່າງປະເທດຕໍ່ ສປປ ເກົາຫຼີ ໃນໂອກາດພົບປະກັບລັດຖະມົນຕີການຕ່າງປະເທດ 10 ປະເທດໃນອາຊຽນຢູ່ນະຄອນຫຼວງວໍຊິງຕັນໃນວັນທີ 4 ພຶດສະພານີ້.
ທ່ານ ພາຕຣິກ ເມີຟີ ຜູ້ຊ່ວຍລັດຖະມົນຕີການຕ່າງປະເທດອາເມລິກາໄດ້ໂທລະສັບເຂົ້າໃນກອງປະຊຸມໃນມື້ດຽວກັນໂດຍກ່າວວ່າ, ໃນການພົບປະ, ທ່ານ ຕິເລີຊັນ ຮຽກຮ້ອງໃຫ້ບັນດາປະເທດໃນອາຊຽນຈົ່ງຕັດເສັ້ນທາງລາຍຮັບຂອງສປປເກົາຫຼີຢູ່ພາກພື້ນອາຊີຕາເວັນອອກສຽງໃຕ້ ແລະຫຼຸດສາຍພົວພັນການທູດກັບ ສປປ ເກົາຫຼີ ໃຫ້ເຖິງລະດັບຕ່ຳທີ່ສຸດ.
ທ່ານ ເມີຟີ ກ່າວອີກວ່າ, ທ່ານຕິເລີຊັນ ກ່າວຕໍ່ລັດຖະມົນຕີການຕ່າງປະເທດ10 ປະເທດອາຊຽນວ່າ, ເປົ້າໝາຍຂອງອາເມລິກາຄືຫວັງໃຫ້ແຫຼມເກົາຫຼີປອດນິວເຄລຍ, ດັ່ງນັ້ນ ຈຶ່ງຂໍໃຫ້ບັນດາປະເທດອາຊຽນຈົ່ງເປັນເອກະພາບກັນໃນດ້ານຫຼັກການແລະການເຄື່ອນໄຫວໃນບັນຫາແຫຼມເກົາຫຼີ ແລະໃຊ້ມາດຕະການທີ່ເໝາະສົມເພື່ອຈັດຕັ້ງປະຕິບັດມະຕິຂອງສະພາຄວາມໝັ້ນຄົງສະຫະປະຊາຊາດກ່ຽວກັບບັນຫາແຫຼມເກົາຫຼີນັ້ນຢ່າງຮອບດ້ານ.
 |
