ຕາມຂ່າວສານຊິນຮວາ: ຜົນການສຳຫຼວດຈາກຫຼາຍອົງການສຳຫຼວດຄວາມເຫັນປະຊາຊົນຂອງຝຣັ່ງສະແດງໃຫ້ເຫັນວ່າ, ທ່ານແອມມານູແອນ ມາຄຣົງ ອະດີດລັດຖະມົນຕີເສດຖະກິດ, ຜູ້ສະໝັກຮັບເລືອກຕັ້ງຂະບວນການ "ກ້າວໄປໜ້າ" ໄດ້ຮັບຄະແນນສຽງຫຼາຍກວ່າ 65% ໃນການປ່ອນບັດເລືອກຕັ້ງປະທານາທິບໍດີຮອບທີ 2 ແລະໄດ້ຮັບເລືອກຕັ້ງເປັນປະທານາທິບໍດີຝຣັ່ງຄົນໃໝ່ ແລະກາຍເປັນປະທານາທິບໍດີທີ່ມີອາຍຸໜຸ່ມທີ່ສຸດ ຄື 39 ປີໃນປະຫວັດສາດເກືອບ 60 ປີຂອງປະເທດດັ່ງກ່າວ.
ທ່ານຝຣັ່ງຊົວ ໂອລອງ ປະທານາທິບໍດີຝຣັ່ງຖະແຫຼງໃນຕອນຄ່ຳມື້ດຽວກັນວ່າ, ຕົນໄດ້ໂທລະສັບສະແດງຄວາມຊົມເຊີຍຕໍ່ທ່ານມາຄຣົງທີ່ໄດ້ຮັບເລືອກຕັ້ງ ເຊິ່ງເປັນໄຊຊະນະທີ່ເປັນການຢືນຢັນວ່າ ປະຊາຊົນສ່ວນຫຼາຍໃນປະເທດຕ້ອງການຄວາມສາມັກຄີກັນຢູ່ພາຍໃຕ້ລະບອບສາທາລະນະລັດ ແລະສ່ອງແສງໃຫ້ເຫັນເຖິງຄວາມເປັນໜຶ່ງດຽວຕໍ່ສະຫະພາບເອີລົບ ແລະເປັນການເປີດປະຕູສູ່ໂລກ.
ທ່ານໂອລອງຈະສິ້ນສຸດຕຳແໜ່ງລົງໃນວັນທີ 14 ເດືອນນີ້ ເຊິ່ງຕາມທຳນຽມ, ປະທານາທິບໍດີຜູ້ທີ່ໄດ້ຮັບການເລືອກຕັ້ງແລະປະທານາທິບໍດີທີ່ໝົດວາລະຕຳແໜ່ງຈະຮ່ວມປຶກສາກັນເພື່ອຕົກລົງເວລາຂຶ້ນດຳລົງຕຳແໜ່ງ.
 |
