ຕາມຂ່າວCRI: ໃນໂອກາດທີ່ຈະຈັດກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ຢູ່ນະຄອນຫຼວງປັກກິ່ງລະຫວ່າງວັນທີ 14 ຫາ 15 ພຶດສະພານີ້ ແລະທ່ານໂຈໂກ ວິໂດໂດ ປະທານາທິບໍດີອິນໂດເນເຊຍຈະເຂົ້າຮ່ວມກອງປະຊຸມຕາມຄຳເຊີນນັ້ນ ທ່ານໂຊແກງ ຣາຮາໂຈ ເອກອັກຄະລັດຖະທູດອິນໂດເນເຊຍປະຈຳຈີນໃຫ້ສຳພາດຕໍ່ນັກຂ່າວ CRI ວ່າ, ທາງລົດໄຟຄວາມໄວສູງຈາກາຕາ-ບັນດຸງໃຫ້ກາຍເປັນໂຄງການສັນຍະລັກໃນການສ້າງ "ໜຶ່ງແລວທາງໜຶ່ງເສັ້ນທາງ" ແລະກໍຫວັງໃຫ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນເຊື່ອມຕໍ່ກັບຍຸດທະສາດແຫ່ງຊາດອິນໂດເນເຊຍ ເພື່ອຊຸກຍູ້ໃຫ້ສອງປະເທດເຊື່ອມຈອດກັນ.
ທ່ານໂຊແກງເຫັນວ່າ, ໃນການຊຸກຍູ້ສ້າງ "ໜຶ່ງແລວທາງໜຶ່ງເສັ້ນທາງ", ການເຊື່ອມສານຈິດໃຈຂອງປະຊາຊົນນັ້ນມີຄວາມສຳຄັນທີ່ສຸດ ເຊິ່ງເປັນພື້ນຖານທາງວັດທະນະທຳໃນການສ້າງ "ໜຶ່ງແລວທາງໜຶ່ງເສັ້ນທາງ". ຂະນະທີ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ບໍ່ພຽງແຕ່ເນັ້ນໃສ່ການເຊື່ອມຈອດກັນຂອງພື້ນຖານໂຄງລ່າງເທົ່ານັ້ນ, ຍັງເນັ້ນໃສ່ການເຊື່ອມສານດ້ານຈິດໃຈຂອງປະຊາຊົນຕື່ມອີກ.
ທ່ານໂຊແກງຍັງກ່າວວ່າ, ກອງປະຊຸມຄັ້ງນີ້ເນັ້ນຫົວຂໍ້ "ເພີ່ມທະວີການຮ່ວມມືສາກົນ ແລະຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ" ເພື່ອບັນລຸການພັດທະນາແບບຕ່າງຝ່າຍຕ່າງມີຜົນປະໂຫຍດ" ແລະສາມາດຕ້ານກະແສແນວຄິດທີ່ຝືນໂລກາພິວັດ. ຈາກນີ້, ປະເທດທີ່ກ່ຽວຂ້ອງຕ້ອງປະຕິບັດຕາມກົດສາກົນທີ່ມີຢູ່ໃນປັດຈຸບັນ ເພື່ອຊຸກຍູ້ເສລິພາບແລະຄວາມເປັນທຳທາງດ້ານການຄ້າແລະການລົງທຶນ.
 |
