ຕາມຂ່າວCRI: ລາວເປັນປະເທດບໍ່ມີທາງອອກສູ່ທະເລພຽງໜຶ່ງດຽວໃນອາຊຽນ ແລະຫຼັງເຫັນຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນ, ລາວໄດ້ວາງນະໂຍບາຍການຫັນ "ຈາກປະເທດບໍ່ມີທາງອອກສູ່ທະເລກາຍເປັນປະເທດເຊື່ອມໂຍງດ້ວຍການບໍລິການທາງຜ່ານ", ຂະນະທີ່ການກະກຽມແລະສ້າງລົດໄຟຄວາມໄວສູງລາວ-ຈີນ ແລະ "ໜຶ່ງແລວທາງໜຶ່ງເສັ້ນທາງ" ໄດ້ຂະຫຍາຍກ້າວຕົວໄປໜ້າຕໍ່ເນື່ອງນັ້ນ, ລາວໄດ້ຍົກນະໂຍບາຍດັ່ງກ່າວເປັນຍຸດທະສາດແຫ່ງຊາດ ສົ່ງຜົນເຮັດໃຫ້ປະເທດລາວທີ່ບໍ່ມີຄວາມສະດວກທາງຄົມມະນາຄົມກາຍເປັນຊຸມທາງທີ່ເຊື່ອມຕໍ່ບັນດາປະເທດອ້ອມຂ້າງ ໂດຍສະເພາະເປັນຈຸດເຊື່ອມຕໍ່ສຳຄັນລະຫວ່າງຈີນກັບອາຊຽນ.
ທັງນີ້ເມື່ອເດືອນກັນຍາປີ 2016, ທ່ານຫຼີເຄີ້ສຽງ ນາຍົກລັດຖະມົນຕີຈີນທີ່ເດີນທາງຢ້ຽມຢາມປະເທດລາວໄດ້ຮ່ວມກັບທ່ານທອງລຸນ ສີສຸລິດ ນາຍົກລັດຖະມົນຕີລາວເປັນສັກຂີພິຍານໃຫ້ແກ່ການລົງນາມໃນ "ບົດບັນທຶກຄວາມເຂົ້າໃຈລະຫວ່າງຈີນ-ລາວກ່ຽວກັບການຮຽບຮຽງແລະຮ່ວມກັນຊຸກຍູ້ແຜນການຮ່ວມສ້າງໜຶ່ງແລວທາງໜຶ່ງເສັ້ນທາງ" ເຊິ່ງສອງຝ່າຍຕົກລົງກັນວ່າ ໃຫ້ຈັດເອົາຂົງເຂດການຮ່ວມມືຕ່າງໆ ເຊັ່ນ: ການກໍ່ສ້າງພື້ນຖານໂຄງລ່າງ, ກະສິກຳ, ການສ້າງຂີດຄວາມສາມາດ, ເຂດນິຄົມອຸດສາຫະກຳ, ວັດທະນະທຳ ແລະອື່ນໆ ບັນຈຸໃນບົດບັນທຶກດັ່ງກ່າວ.
 |
