ວັນທີ 12 ພຶດສະພານີ້, ເວທີປຶກສາຫາລືການຮ່ວມມືດ້ານເສດຖະກິດການຄ້າລະຫວ່າງຈີນ-ຫວຽດນາມທີ່ຈັດຂຶ້ນຢູ່ປັກກິ່ງແຈ້ງໃຫ້ຮູ້ວ່າ: ຊຸມປີມໍ່ໆມານີ້,ການຮ່ວມມືດ້ານເສດຖະກິດການຄ້າລະຫວ່າງຈີນ-ຫວຽດນາມໄດ້ມີການຂະຫຍາຍຕົວຢ່າງວ່ອງໄວ,ມູນຄ່າການຄ້າລະຫວ່າງສອງປະເທດໄດ້ສ້າງສະຖິຕິໃໝ່ຢ່າງລຽນຕິດ,ປະຈຸບັນກຳລັງກ້າວເຂົ້າສູ່ລະດັບ 100 ຕື້ໂດລາສະຫະລັດ.
ໃນເວທີປຶກສາຫາລື,ທ່ານສຽນເຄີ້ໝີງ ຮອງລັດຖະມົນຕີກະຊວງການຄ້າຈີນແນະນຳໃຫ້ຮູ້ວ່າ:ປີ 2016,ມູນຄ່າການຄ້າລະຫວ່າງຈີນ-ຫວຽດນາມໄດ້ບັນລຸເຖິງ 98 ຕື້ 200 ລ້ານໂດລາສະຫະລັດ ເຊິ່ງໄດ້ສ້າງສະຖິຕິໃໝ່. ປະຈຸບັນ,ຈີນເປັນຄູ່ການຄ້າໃຫຍ່ອັນດັບໜຶ່ງຂອງຫວຽດນາມ,ຍັງເປັນຕະຫຼາດສົ່ງອອກຜະລິດຕະພັນກະສິກຳທີ່ໃຫຍ່ທີ່ສຸດຂອງຫວຽດນາມ, ຈີນນຳເຂົ້າສິນຄ້າຈາກຫວຽດນາມເພີ່ມຂຶ້ນຢ່າງບໍ່ຢຸດຢັ້ງ,ການຄ້າລະຫວ່າງສອງຝ່າຍໄດ້ດຸນດ່ຽງກັນກວ່າເກົ່າ.
ທ່ານຫງວຽນຈິດຸງ ລັດຖະມົນຕີກະຊວງແຜນການແລະການລົງທຶນຫວຽດນາມກ່າວວ່າ: ຊຸມປີມໍ່ໆມານີ້,ຫວຽດນາມໄດ້ສຸມກຳລັງໃສ່ເຂົ້າໃນການປັບປຸງລະບົບເສດຖະກິດຕະຫຼາດແລະສະພາບແວດລ້ອມການລົງທຶນການທຸລະກິດໃຫ້ສົມບູນແບບ,ແລະດຶງດູດວິສາຫະກິດຕ່າງປະເທດມາລົງທຶນຫຼາຍກວ່າເກົ່າ. ປະຈຸບັນນີ້,ໄດ້ມີວິສາຫະກິດຈີນຈຳນວນຫຼວງຫຼາຍໄປລົງທຶນສ້າງການທຸລະກິດຢູ່ຫວຽດນາມ,ນັບລວມແລ້ວມີເຖິງ 11 ຕື້ 200 ລ້ານໂດລາສະຫະລັດ ເຊິ່ງໄດ້ປະກອບສ່ວນອັນສຳຄັນເຂົ້າໃນການພັດທະນາຂອງເສດຖະກິດຫວຽດນາມ. ເສດຖະກິດຫວຽດນາມແລະຈີນມີຄວາມສະໜັບສະໜູນກັນຫຼາຍ,ຫວັງໃຫ້ວິສາຫະກິດຈີນທີ່ເຂັ້ມແຂງຫຼາຍກວ່າເກົ່າມາລົງທຶນຢູ່ຫວຽດນາມ.
ຂໍ້ມູນສະຖິຕິຈາກກົມໃຫຍ່ດ່ານພາສີຈີນສະແດງໃຫ້ເຫັນວ່າ:ປີ 2016,ຈີນໄດ້ນຳເຂົ້າສິນຄ້າຈາກຫວຽດນາມມູນຄ່າ 37 ຕື້ 100 ລ້ານໂດລາສະຫະລັດ,ເພື່ອຂຶ້ນຫຼາຍກວ່າປີກ່ອນ 24,5%; ແລະໄດ້ສົ່ງອອກສິນຄ້າໄປຂາຍຢູ່ຫວຽດນາມມູນຄ່າ 61 ຕື້ 100 ລ້ານໂດລາສະຫະລັດ. ຫວຽດນາມໄດ້ຫຼາຍກວ່າມາເລເຊຍແລະກາຍເປັນຄູ່ການຄ້າໃຫຍ່ອັນດັບໜຶ່ງຂອງຈີນໃນອາຊຽນ.