ຕາມຂ່າວCRI: ເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ຈະໄຂຂຶ້ນຢູ່ນະຄອນຫຼວງປັກກິ່ງໃນໄວໆນີ້. ທ່ານຮຸນແຊນ, ນາຍົກລັດຖະມົນຕີກຳປູເຈຍຈະເຂົ້າຮ່ວມເວທີປຶກສາຫາລືດັ່ງກ່າວ, ແລະຢ້ຽມຢາມຈີນຢ່າງເປັນທາງການ. ກ່ອນຈະອອກເດີນທາງ, ທ່ານຮຸນແຊນກ່າວໃນເວລາໃຫ້ສຳພາດຮ່ວມທາງລາຍລັກອັກສອນຕໍ່ວິທະຍຸສາກົນແຫ່ງປະເທດຈີນຫຼື CRI, ຂ່າວສານຊິນຮວາ, ໜັງສືພິມ"ເຢີນໝິນຢື້ປ້າວ"ແລະໜັງສືພິມຊາວໜຸມຈີນວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ເອົາໃຈໃສ່ນຳການປະສານງານດ້ານນະໂຍບາຍການພັດທະນາລະຫວ່າງບັນດາປະເທດຄູ່ຮ່ວມມືບົນພື້ນຖານທີ່ເຄົາລົບເຊິ່ງກັນແລະກັນ, ເຊິ່ງໄດ້ສອດຄ່ອງກັບແຜນການພັດທະນາຂອງກຳປູເຈຍເປັນຢ່າງດີ.
ທ່ານຮຸນແຊນກ່າວວ່າ, ເວທີປຶກສາຫາລືຄັ້ງນີ້ຈະສະໜອງໂອກາດອັນໜຶ່ງໃຫ້ແກ່ຝ່າຍຕ່າງໆທີ່ກ່ຽວຂ້ອງເພື່ອປະກອບຄວາມເຫັນ, ເພີ່ມທະວີການຕິດຕໍ່ກັນແລະຮັດແໜ້ນການພົວພັນກັນ, ເຊິ່ງຈະມີຜົນດີຕໍ່ການເຮັດໃຫ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ໄດ້ຮັບການປະຕິບັດຕື່ມອີກ. ທ່ານຮຸນແຊນກໍຈະກ່າວປາຖະກະຖາທີ່ມີຫົວຂໍ້ວ່າ "ຊຸກຍູ້ກຳລັງແຮງຮ່ວມດ້ານນະໂຍບາຍ" ແລະ "ເພີ່ມທະວີການເຊື່ອມຕໍ່ກັນລະຫວ່າງປະຊາຊົນ" ໃນເວທີປຶກສາຫາລື.
ໃນການສຳພາດ, ທ່ານຮຸນແຊນໄດ້ຕີລາຄາສູງຕໍ່ຄວາມໝາຍອັນສຳຄັນຂອງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ທີ່ມີຕໍ່ການພັດທະນາຮ່ວມລະຫວ່າງກຳປູເຈຍກັບຈີນຈາກ. ທ່ານກ່າວວ່າ: ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ມີຈຸດພິເສດອັນໜຶ່ງຄື, ເອົາໃຈໃສ່ນຳການປະສານງານດ້ານນະໂຍບາຍການພັດທະນາລະຫວ່າງບັນດາປະເທດຄູ່ຮ່ວມມືບົນພື້ນຖານທີ່ເຄົາລົບນັບຖືເຊິ່ງກັນແລະກັນ. ເວົ້າສໍາລັບກຳປູເຈຍແລ້ວ, ຂໍ້ລິເລີ່ມ"ໜຶ່ງແລວທາງໜຶ່ງເສັ້ນທາງ" ໄດ້ສອງຄ່ອງກັບແຜນການພັດທະນາຂອງກຳປູເຈຍເປັນຢ່າງດີ.
ປີ 2018 ແມ່ນປີທີ່ກໍາປູເຈຍກັບຈີນສ້າງສາຍພົວພັນທາງການທູດຄົບຮອບ 60 ປີ, ທ່ານຮຸນແຊນກ່າວວ່າ: "ໃນ 60 ປີທີ່ຜ່ານມາ, ການຮ່ວມມືລະຫວ່າງກຳປູເຈຍກັບຈີນໄດ້ຮັບຜົນສຳເລັດຢ່າງອຸດົມສົມບູນ, ຂ້າພະເຈົ້າຫວັງວ່າກຳປູເຈຍກັບຈີນຈະສືບຕໍ່ກ້າວໄປໜ້າ, ເຮັດໃຫ້ມິດຕະພາບລະຫວ່າງສອງປະເທດເລິກເຊິ່ງກວ່າເກົ່າ."
 |
