ຕາມຂ່າວCRI: ວັນທີ 12 ພຶດສະພານີ້, ທ່ານວ່າງຢາງ, ຮອງນາຍົກລັດຖະມົນຕີຈີນກັບທ່ານຈັນ ດາຍ ກວາງ, ປະທານປະເທດຫວຽດນາມທີ່ເດີນທາງມາຢ້ຽມ ຢາມຈີນໄດ້ເຂົ້າຮ່ວມເວທີປຶກສາຫາລືການຮ່ວມມືດ້ານເສດຖະກິດການຄ້າຈີນ-ຫວຽດນາມ 2017 ແລະໄດ້ກ່າວຄຳປາໄສ.
ທ່ານວ່າງຢາງກ່າວວ່າ, ໃນຊຸມປີມໍ່ໆມານີ້, ການພົວພັນລະຫວ່າງຈີນຫວຽດນາມມີທ່ວງທ່າຢ່າງດີ, ຂະໜາດແລະລະດັບຂອງການລົງທຶນແລະການຄ້າໄດ້ຮັບການຍົກສູງຢ່າງຕໍ່ເນື່ອງ, ການແລກປ່ຽນແລະການຮ່ວມມືໃນທຸກຂົງເຂດໄດ້ດຳເນີນໄປຢ່າງສະດວກກວ່າເກົ່າ. ຈີນກັບຫວຽດນາມຄວນປະຕິບັດຄວາມຮັບຮູ້ທີ່ເປັນເອກະພາບກັນຕ່າງໆລະຫວ່າງທ່ານປະທານສີຈິ້ນຜິງກັບຜູ້ນຳຫວຽດນາມໃຫ້ດີ, ຊຸກຍູ້ໃຫ້ການຮ່ວມມືຕົວຈິງລະຫວ່າງສອງປະເທດຂຶ້ນສູ່ລະດັບໃໝ່. ຈີນຍິນດີເພີ່ມທະວີການເຊື່ອມຕໍ່ດ້ານຍຸດທະສາດການພັດທະນາກັບຫວຽດ ນາມ, ຍົກສູງລະດັບການຄ້າ, ເປີດກວ້າງການຮ່ວມມືດ້ານການຜະລິດແລະການລົງທຶນ, ລົງເລິກການຮ່ວມມືດ້ານການສຶກສາ, ສາທາລະນະສຸກ, ວັດທະນະທຳ, ກະສິກຳແລະການທ່ອງທ່ຽວ, ສ້າງຄວາມສຸກໃຫ້ແກ່ປະຊາຊົນສອງຊາດຫຼາຍກວ່າເກົ່າ.
ທ່ານຈັນ ດາຍ ກວາງກ່າວວ່າ, ຫວຽດນາມກັບຈີນແມ່ນປະເທດບ້ານໃກ້ເຮືອນຄຽງທີ່ມີສາຍພູສາຍນ້ຳຕິດຈອດກັນ, ການພົວພັນລະຫວ່າງສອງປະເທດມີມູນເຊື້ອຢ່າງຍາວນານ.ຫວຽດນາມເອົາໃຈໃສ່ນຳການຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມກັບຈີນ, ຈະຕັ້ງໜ້າປັບປຸງສະພາບແວດລ້ອມການລົງທຶນໃຫ້ດີກວ່າເກົ່າ, ອຳນວຍຄວາມສະດວກໃຫ້ແກ່ວິສາຫະກິດຈີນໃນການເປີດກວ້າງການຮ່ວມມືດ້ານການລົງທຶນຢູ່ຫວຽດນາມ.
 |
