ກອງປະຊຸມສຸດຍອດອາຊຽນຂອງເວທີປຶກສາຫາລືເສດຖະກິດໂລກສຸມໃສ່ການເຊື່ອມໂຍງເຂົ້າກັນ
ຕາມຂ່າວສານຊິນຮວາ: ໃນກອງປະຊຸມສຸດຍອດອາຊຽນຂອງເວທີປຶກສາຫາລືເສດຖະກິດໂລກປີ 2017 ທີ່ຈັດຂຶ້ນຢູ່ນະຄອນຫຼວງພະນົມເປັນຂອງກຳປູເຈຍ, ການສ້າງພື້ນຖານໂຄງລ່າງກັບການເຊື່ອມໂຍງເຂົ້າກັນກາຍເປັນຫົວຂໍ້ທີ່ໄດ້ຮັບຄວາມສົນໃຈຫຼາຍກວ່າໝູ່. ຜູ້ຮ່ວມປະຊຸມຮຽກຮ້ອງໃຫ້ລັດຖະບານກັບພາກສ່ວນເອກະຊົນດຳເນີນການຮ່ວມມືຢ່າງກວ້າງຂວາງ, ຊຸກຍູ້ການສ້າງພື້ນຖານໂຄງລ່າງໃນພາກພື້ນ, ຊຸກຍູ້ການເຊື່ອມໂຍງເຂົ້າກັນ.
ກອງປະຊຸມສຸດຍອດໄດ້ຈັດຂຶ້ນຢູ່ນະຄອນຫຼວງພະນົມເປັນແຕ່ວັນທີ 10 ຫາວັນທີ 12 ພຶດສະພານີ້, ບຸກຄົນຈາກວົງການການເມືອງ, ວົງການການຄ້າແລະພົນລະເຮືອນ 700 ກວ່າທ່ານໄດ້ເຂົ້າຮ່ວມກອງປະຊຸມເທື່ອນີ້.
ໃນກອງປະຊຸມສຸດຍອດ, ທ່ານຮຸນແຊນ ນາຍົກລັດຖະມົນຕີກຳປູເຈຍກ່າວວ່າ, ຂໍ້ລິເລີ່ມ ໜຶ່ງແລວທາງໜຶ່ງເສັ້ນທາງ ທີ່ຈີນສະເໜີອອກນັ້ນ ໄດ້ນຳເອົາຄວາມຫວັງໃຫ້ແກ່ການສ້າງພື້ນຖານໂຄງລ່າງຂອງປະເທດທີ່ກຳລັງພັດທະນາ, ທະນາຄານການລົງທຶນອາຊີແລະກອງທຶນເສັ້ນທາງສາຍໄໝ ຈະອຳນວຍຄວາມຊ່ວຍເຫຼືອດ້ານເງິນທຶນອັນໃໝ່ໃຫ້ແກ່ການສ້າງພື້ນຖານໂຄງລ່າງແລະການເຊື່ອມໂຍງເຂົ້າກັນຂອງບັນດາປະເທດທ່ກ່ຽວຂ້ອງໂດຍສະເພາະແມ່ນປະເທດອາຊຽນ.
ທ່ານຈີ່ນລີ້ຊຸນ ປະທານລວມຂອງກອງປະຊຸມສຸດຍອດອາຊຽນຂອງເວທີປຶກສາຫາລືເສດຖະກິດໂລກ ປະທານທະນາຄານການລົງທຶນອາຊີກ່າວວ່າ, ການສ້າງພື້ນຖານໂຄງລ່າງມີຄວາມສຳຄັນຫຼາຍຕໍ່ການເຊື່ອມໂຍງເຂົ້າກັນຂອງ 10 ປະເທດອາຊຽນ, ທະນາຄານການລົງທຶນອາຊີຈະອຳນວຍການສະໜັບສະໜູນດ້ານການທະນາຄານແລະເຕັກນິກໃຫ້ແກ່ການສ້າງພື້ນຖານໂຄງລ່າງອາຊຽນ. ທ່ານກ່າວວ່າ, ການລົງທຶນດ້ານພື້ນຖານໂຄງລ່າງສາມາດສ້າງຄຸນຄ່າເສດຖະກິດສູງ, ແຕ່ຖ້າບໍ່ມີການເຊື່ອມໂຍງເຂົ້າກັນ, ໂຄງການພື້ນຖານໂຄງລ່າງຈຳນວນໜຶ່ງ ອາດຈະກາຍເປັນຊັບສິນທີ່ທັງແພງທັງໄຮ້ປະໂຫຍດ. ມາດຖານໃນການພິຈາລະນາໂຄງການພື້ນຖານໂຄງລ່າງ ບໍ່ພຽງແຕ່ຢູ່ບ່ອນວ່າ ມັນສາມາດສ້າງຜົນສະທ້ອນໃຫ້ປະເທດນັ້ນໄດ້ຫຼືບໍ່, ຍັງຕ້ອງເບີ່ງວ່າ ມັນສາມາດນຳເອົາຜົນປະໂຫຍດມາໃຫ້ປະເທດອ້ອມຂ້າງຫຼືບໍ່.