ກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ໄດ້ໄຂຂຶ້ນຢູ່ນະຄອນຫຼວງປັກກິ່ງໃນວັນທີ 14 ເດືອນນີ້, ປະມຸກລັດຫຼາຍປະເທດໄດ້ກ່າວຄຳປາໄສໃນພິທີໄຂກອງປະຊຸມ.
ທ່ານວະລາຕີເມຍ ປູຕິນ ປະທານາທິບໍດີຣັດເຊຍກ່າວຄຳປາໄສວ່າ, ປະເທດສະມາຊິກສະຫະພັນເສດຖະກິດອາຊີ-ເອີລົບຕັ້ງໜ້າສະໜູບສະໜູນຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ". ຂໍ້ສະເໜີທີ່ທ່ານປະທານສີຈິ້ນຜິງສະເໜີອອກມາແມ່ນທັນການທີ່ສຸດ ແລະໄດ້ສ່ອງແສງເຖິງທ່າທີປະດິດສ້າງຂອງຈີນຕໍ່ບັນຫາເຊື່ອມໂຍງເຂົ້າກັນ.
ທ່ານອັນໂຕນິໂອ ກູເຕີເຣດສ໌ ເລຂາທິການໃຫຍ່ອົງການສະຫະປະຊາຊາດກ່າວວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແລະວາລະການພັດທະນາແບບຍືນຍົງປີ 2030 ລ້ວນແຕ່ຖືເອົາການພັດທະນາແບບຍືນຍົງເປັນເປົ້າໝາຍ, ລ້ວນແຕ່ມີເຈດຕະນາສະໜອງໂອກາດ, ຜະລິດຕະພັນສາທາລະນະທົ່ວໂລກແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ ເພື່ອເຮັດໃຫ້ປະເທດທີ່ລຽບຕາມ "ໜຶ່ງແລວທາງໜຶ່ງເສັ້ນທາງ" ໄດ້ຮັບຜົນປະໂຫຍດຈາກຄວາມບົ່ມຊ້ອນທີ່ກຳເນີດຈາກການເພີ່ມທະວີການພົວພັນກັນ, ເພີ່ມທະວີການພົວພັນລະຫວ່າງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ກັບວາລະການພັດທະນາແບບຍືນຍົງປີ 2030 ແມ່ນສຳຄັນທີ່ສຸດ.
ທ່ານຣີເຊບ ໄຕຢິບ ເອໂດກັນ ປະທານາທິບໍດີຕວກກີກ່າວວ່າ, ເຊື່ອວ່າ "ໜຶ່ງແລວທາງໜຶ່ງເສັ້ນທາງ" ຍ່ອມຈະກາຍເປັນເສັ້ນທາງສ້າງຜົນປະໂຫຍດໃຫ້ແກ່ບັນດາຝ່າຍທີ່ຊຸກຍູ້ສັນຕິພາບແລະສະຖຽນລະພາບ ແລະຕວກກີຈະເຂົ້າຮ່ວມແລະສະໜັບສະໜູນການສ້າງ "ໜຶ່ງແລວທາງໜຶ່ງເສັ້ນທາງ" ຢ່າງສຸດຂີດ.
 |
