ຕາມຂ່າວCRI: ທ່ານຫຼີເຄີ້ສຽງ ນາຍົກລັດຖະມົນຕີແຫ່ງ ສປ ຈີນໄດ້ພົບປະທ່ານບຸນຍັງ ວໍລະຈິດ ປະທານປະເທດແຫ່ງ ສປປ ລາວ ທີ່ມາເຂົ້າຮ່ວມກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ຫໍສະພາປະຊາຊົນແຫ່ງຊາດໃນຕອນບ່າຍວັນທີ 13 ເດືອນນີ້.
ທ່ານຫຼີເຄີ້ສຽງກ່າວວ່າ, ຈີນແລະລາວມີມູນເຊື້ອໄມຕີຈິດມິດຕະພາບມາແຕ່ດົນນານ, ການພົວພັນລະຫວ່າງສອງປະເທດໄດ້ຂະຫຍາຍລົງສູ່ລວງເລິກຢ່າງບໍ່ຢຸດຢັ້ງ. ພວກເຮົາຍິນດີເອົາຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ເຊື່ອມຕໍ່ກັບຍຸດທະສາດ "ຫັນປະເທດບໍ່ມີທາງອອກສູ່ທະເລເປັນປະເທດທາງຜ່ານຂອງພາກພື້ນ" ແລະຮັບປະກັນໃຫ້ໂຄງການທາງລົດໄຟລາວ-ຈີນ, ເຂດຮ່ວມມືເສດຖະກິດຊາຍແດນ ແລະໂຄງການອື່ນໆໄດ້ຮັບການປະຕິບັດຢ່າງສະດວກ. ຈີນເອົາໃຈໃສ່ລາວທີ່ໄດ້ເສີມຂະຫຍາຍບົດບາດສຳຄັນໃນວຽກງານພາກພື້ນ, ຍິນດີເພີ່ມທະວີການແລກປ່ຽນແລະປະສານງານກັບລາວພາຍໃຕ້ການພົວພັນຈີນ-ອາຊຽນ ແລະກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ເພື່ອສ້າງຄວາມຜາສຸກໃຫ້ແກ່ປະຊາຊົນພາກພື້ນໄດ້ດີກວ່າເກົ່າ.
ທ່ານບຸນຍັງ ວໍລະຈິດກ່າວວ່າ, ລາວແລະຈີນເປັນຄູ່ຮ່ວມຊາຕາກຳທີ່ໄວ້ເນື້ອເຊື່ອໃຈກັນ. ລາວຍິນດີເພີ່ມທະວີການໄປມາຫາສູ່ຂັ້ນສູງກັບຈີນຢ່າງແໜ້ນແຟ້ນ ແລະລົງເລິກການຮ່ວມມືໃນຂົງເຂດເສດຖະກິດການຄ້າ, ການລົງທຶນ, ການກໍ່ສ້າງພື້ນຖານໂຄງລ່າງ ແລະອື່ນໆ, ເລັ່ງການກໍ່ສ້າງໂຄງການສຳຄັນຕ່າງໆ ເຊັ່ນ ໂຄງການທາງລົດໄຟລາວ-ຈີນເປັນຕົ້ນ. ເຊື່ອວ່າ ພາຍໃຕ້ຄວາມພະຍາຍາມຮ່ວມຂອງສອງຝ່າຍ, ການພົວພັນຄູ່ຮ່ວມມືຍຸດທະສາດຮອບດ້ານລາວ-ຈີນຍ່ອມຈະໄດ້ຂະຫຍາຍຕົວໄປໜ້າເລື້ອຍໆ.
 |
