ກອງປະຊຸມໂຕະມົນເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ໄດ້ໄຂຂຶ້ນຢູ່ສູນປະຊຸມສາກົນຢ້ຽນຊີ່ຫູນະຄອນຫຼວງປັກກິ່ງ ສປ ຈີນໃນວັນທີ 15 ພຶດສະພານີ້ໂດຍການເປັນປະທານຂອງທ່ານສີຈິ້ນຜິງ ປະທານປະເທດແຫ່ງສປຈີນ. ໃນໂອກາດກ່າວປາໄສໃນພິທີດັ່ງກ່າວ, ທ່ານສີຈິ້ນຜິງກ່າວເນັ້ນວ່າ, "ໜຶ່ງແລວທາງໜຶ່ງເສັ້ນທາງ" ລິເລີ່ມຢູ່ປະເທດຈີນແຕ່ຂຶ້ນກັບທົ່ວໂລກ, ແລະເປີດປະຕູຕໍ່ໝູ່ເພື່ອນມີອຸດົມການອັນດຽວກັນໃນໂລກ, ບໍ່ປັດປ່າຍກໍບໍ່ແນໃສ່ຝ່າຍໃດຝ່າຍໜຶ່ງ.
ໃນໂອກາດກ່າວປາໄສ, ທ່ານສີຈິ້ນຜີງໄດ້ບັນລະຍາຍຢ່າງລະອຽດກ່ຽວກັບເບື້ອງຫຼັງແລະເປົ້າໝາຍທີ່ສະເໜີຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ". ທ່ານກ່າວວ່າ, ຂໍ້ລິເລີ່ມດັ່ງກ່າວແມ່ນເນື່ອງຈາກການສັງເກດແລະພິຈາລະນາຕໍ່ສະຖານະການຂອງໂລກ, ເນື້ອໃນແກນກາງຂອງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ກໍຄືຊຸກຍູ້ການກໍ່ສ້າງພື້ນຖານໂຄງລ່າງແລະເຊື່ອມຈອດກັນ, ເຊື່ອມຕໍ່ກັບນະໂຍບາຍແລະຍຸດທະສາດພັດທະນາຂອງປະເທດຕ່າງໆ, ລົງເລິກການຮ່ວມມືຢ່າງແທ້ຈິງ, ຊຸກຍູ້ການພັດທະນາໂດຍປະສານສົມທົບ, ແລະບັນລຸຄວາມຈະເລີນຮຸ່ງເຮືອງຮ່ວມ. ທ່ານສີຈິ້ນຜິງຫວັງວ່າເວທີປຶກສາຫາລືເທື່ອນີ້ມີຜົນດີຕໍ່ການເຕົ້າໂຮມຄວາມຮັບຮູ້ຄືກັນຕື່ມອີກ, ຊີ້ທາງໃຫ້ແກ່ການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ".
ຂ່າວແຈ້ງວ່າ, ກອງປະຊຸມສຸດຍອດໂຕະມົນເທື່ອນີ້ຈະບັນລຸ "ປະກາດແຈ້ງການຮ່ວມຂອງກອງປະຊຸມສຸດຍອດໂຕະມົນ" ສະບັບໜຶ່ງ, ແລະສ່ອງແສງໃຫ້ເຫັນເຖິງຄວາມຮັບຮູ້ຄືກັນຂອງຝ່າຍຕ່າງໆກ່ຽວກັບການກໍ່ສ້າງ "ໜຶ່ງແລວທາງໜຶ່ງເສັ້ນທາງ".
 |
