ຕອນບ່າຍວັນທີ 15 ພຶດສະພານີ້ຢູ່ຫໍສະພາປະຊາຊົນແຫ່ງຊາດນະຄອນຫຼວງປັກກິ່ງ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານອັນໂຕນິໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໃນໂອກາດເດີນທາງເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ". ທ່ານຫຼີເຄີ້ສຽງຢືນຢັນວ່າ ຈີນໃນຖານະເປັນປະເທດສະມາຊິກກໍ່ຕັ້ງອົງການສະຫະປະຊາຊາດແລະປະເທດມົນຕີຖາວອນປະຈຳສະພາຄວາມໝັ້ນຄົງອົງການສະຫະປະຊາຊາດນັ້ນກໍສາມາດຮັກສາຈຸດປະສົງແລະຫຼັກການຂອງກົດບັດສະຫະປະຊາຊາດໄວ້ໄດ້ຢ່າງເດັດດ່ຽວແລະສະເໝີຕົ້ນສະເໝີປາຍ. ຂະນະດຽວກັນຈີນກໍພ້ອມນຳໃຊ້ເວທີຕ່າງໆເຊັ່ນອົງການສະຫະປະຊາຊາດເພື່ອເສີມຂະຫຍາຍບົດບາດຂອງປະເທດໃຫຍ່ທີ່ກຳລັງພັດທະນາຢ່າງມີຄວາມຮັບຜິດຊອບແລະພະຍາຍາມທີ່ສຸດເພື່ອຈັດຕັ້ງປະຕິບັດວາລະການພັດທະນາແບບຍືນຍົງ 2030ໃຫ້ໄດ້ຮັບປະສິດທິຜົນ ທັງສົ່ງເສີມສັນຕິພາບ,ສະຖຽນລະພາບກັບການພັດທະນາແລະວັດທະນາຖາວອນຂອງໂລກ.
ທ່ານກູເຕີເຣັສຢືນຢັນວ່າ ຈີນເປັນເສົາຄ້ຳສຳຄັນໃນການຊຸກຍູ້ລັດທິຫຼາຍຝ່າຍ,ການຄ້າເສລີຂອງໂລກພ້ອມດ້ວຍຂະບວນການໂລກາພິວັດໃຫ້ກ້າວໄປໜ້າຢ່າງຍຸຕິທຳແລະເປັນລະບຽບຮຽບຮ້ອຍ, ສະຫະປະຊາຊາດຍິນດີເພີ່ມທະວີການຮ່ວມມືກັບຈີນເພື່ອເຮັດໃຫ້ການຈັດຕັ້ງປະຕິບັດວາລະການພັດທະນາແບບຍືນຍົງ 2030ເຊື່ອມຕໍ່ກັບຍຸດທະສາດການພັດທະນາແລະຂໍ້ລິເລີ່ມຂອງຈີນໃຫ້ມີປະສິດທິຜົນຫຼາຍກວ່າເກົ່າ ທັງສົ່ງເສີມສັນຕິພາບແລະສະຖຽນລະພາບຂອງໂລກໃນທ່າມກາງການພັດທະນາແບບຍືນຍົງ.
 |
