ຕາມຂ່າວCRI: ທ່ານສີຈິ້ນຜິງ ປະທານປະເທດຈີນໄດ້ພົບປະທ່ານໂຣດຣິໂກ ດູເຕີເຕ ປະທານາທິບໍດີຟີລິບປິນໃນໂອກາດເດີນທາງເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ນະຄອນຫຼວງປັກກິ່ງໃນວັນທີ 15 ເດືອນນີ້.
ທ່ານສີຈິ້ນຜິງກ່າວເນັ້ນວ່າ, ຜູ້ນຳຂັ້ນສູງສອງປະເທດຄວນເພີ່ມທະວີການແລກປ່ຽນບັນຫາສຳຄັນທີ່ພົວພັນເຖິງການເສີມຂະຫຍາຍສາຍພົວພັນລະຫວ່າງສອງປະເທດ ແລະນຳພາສາຍພົວພັນລະຫວ່າງສອງປະເທດຂະຫຍາຍໄປຕາມທິດທາງທີ່ຖືກຕ້ອງປອດໃສແລະໜັກແໜ້ນ. ຈີນສະໜັບສະໜູນຟີລິບປິນໃນຖານະເປັນປະເທດປະທານໝູນວຽນອາຊຽນ ແລະຈະເພີ່ມທະວີການແລກປ່ຽນແລະຮ່ວມມືກັບບັນດາປະເທດໃນອາຊຽນ, ເປີດກວ້າງການສ້າງຜົນປະໂຫຍດຮ່ວມດ້ານການເມືອງ, ຄວາມໝັ້ນຄົງ ແລະເສດຖະກິດ, ການແລກປ່ຽນດ້ານວັດທະນະທຳ ເພື່ອຊຸກຍູ້ການພົວພັນຈີນ-ອາຊຽນກ້າວຂຶ້ນສູ່ລະດັບໃໝ່.
ທ່ານດູເຕີເຕໄດ້ສະແດງຄວາມຊົມເຊີຍຜົນສຳເລັດຂອງກອງປະຊຸມເທື່ອນີ້ ແລະກ່າວວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຈະຊຸກຍູ້ການເຊື່ອມຈອດກັນແລະການເຕີບໂຕຂອງເສດຖະກິດອາຊີຢ່າງແຂງແຮງ ແລະຈະນຳເອົາໂອກາດໃນການສ້າງວຽກເຮັດງານທຳແລະຄວາມຈະເລີນຮຸ່ງເຮືອງມາໃຫ້ຟີລິບປິນ. ອີກເທື່ອໜຶ່ງສະແດງຄວາມຂອບໃຈຈີນທີ່ໄດ້ສະໜັບສະໜູນໃນຂົງເຂດການເມືອງ, ເສດຖະກິດການຄ້າ, ການປາບປາມຢາເສບຕິດ ແລະອື່ນໆ ແລະຟີລິບປິນຈະຕັ້ງໜ້າຊຸກຍູ້ການຮ່ວມມືລະຫວ່າງອາຊຽນກັບຈີນໃຫ້ແຂງແຮງກວ່າເກົ່າ.
 |
