ຕາມຂ່າວສານຊິນຮວາ: ທ່ານ ຊີຊຽນຈິ້ນ ເອກອັກຄະລັດຖະທູດຈີນປະຈຳຊີຣີ ແລະທ່ານ ອີມັດ ຊາບູນີ ຫົວໜ້າອົງການແຜນການແລະການຮ່ວມມືສາກົນຂອງຊີຣີ ໄດ້ຕາງໜ້າລັດຖະບານສອງປະເທດລົງນາມໃນເອກະສານແລກປ່ຽນວ່າດ້ວຍການຊ່ວຍເຫຼືອລ້າຊີຣີຂອງຈີນ ຄື: ສັນຍາການຮ່ວມມືເສດຖະກິດເຕັກນິກ ແລະການຊ່ວຍເຫຼືອທັນຍາຫານ.
ທ່ານ ຊາບູນີ ໄດ້ຕາງໜ້າລັດຖະບານຊີຣີ ສະແດງຄວາມຂອບໃຈລັດຖະບານແລະປະຊາຊົນຈີນທີ່ໃຫ້ການຊ່ວຍເຫຼືອປະຊາຊົນປະເທດຕົນແບບມະນຸດສະທຳມາເປັນເວລາດົນນານ ແລະເນັ້ນວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທີ່ຈີນສະເໜີອອກນັ້ນ ສາມາດເຮັດໃຫ້ປະເທດພວມພັດທະນາ ໄດ້ຮັບຜົນປະໂຫຍດ ແລະໃນຕໍ່ໜ້າກໍຫວັງວ່າ ຈະໄດ້ເພີ່ມທະວີການຮ່ວມມືກັບຈີນໃນຂົງເຂດຕ່າງໆພາຍໃຕ້ຂອບ "ໜຶ່ງແລວທາງໜຶ່ງເສັ້ນທາງ".
ເດືອນກຸມພາປີນີ້, ລັດຖະບານຈີນແລະຊີຣີ ໄດ້ລົງນາມໃນສັນຍາການຮ່ວມມືເສດຖະກິດເຕັກນິກກ່ຽວກັບການຊ່ວຍເຫຼືອລ້າ ໂດຍຈີນໄດ້ບໍລິຈາກອຸປະກອນການແພດຊຸດໜຶ່ງໃຫ້ໂຮງໝໍທະຫານຊີຣີໃນເດືອນມີນາຜ່ານມາ ເພື່ອແກ້ໄຂຄວາມຫຍຸ້ງຍາກທາງເສດຖະກິດແລະຕອບສະໜອງຄວາມຕ້ອງການດ້ານມະນຸດສະທຳຂອງຊີຣີໃນປັດຈຸບັນ.