ຕອນເຊົ້າວັນທີ 16 ພຶດສະພານີ້ ຢູ່ຫໍສະພາປະຊາຊົນແຫ່ງຊາດນະຄອນຫຼວງປັກກິ່ງ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ຮຸນແຊນ ນາຍົກລັດຖະມົນຕີກຳປູເຈຍໃນໂອກາດເດີນທາງຢ້ຽມຢາມຈີນແລະເຂົ້າຮ່ວມກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" .
ທ່ານ ຫຼີເຄີ້ສຽງ ກ່າວວ່າ: ລັດຖະບານຈີນສຸມໃສ່ຍົກລະດັບການຮ່ວມມືກັບກຳປູເຈຍຢ່າງຮອບດ້ານ ທັງຍິນດີເລັ່ງພັດທະນາການເຊື່ອມຕໍ່ກັນທາງດ້ານຍຸດທະສາດ,ຊຸກຍູ້ການຍົກລະດັບຄຸນນະພາບແລະປະລິມານການຄ້າລະຫວ່າງສອງຝ່າຍ. ຂະນະທີ່ປີໜ້າແມ່ນປີຄົບຮອບ 15 ປີແຫ່ງການສ້າງຕັ້ງການພົວພັນຄູ່ຮ່ວມຍຸດທະສາດລະຫວ່າງຈີນ-ອາຊຽນ ໂດຍກຳປູເຈຍຈະເປັນເຈົ້າພາບຈັດກອງປະຊຸມຜູ້ນຳການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 2 ນັ້ນ, ຈີນສະໜັບສະໜູນກຳປູເຈຍເສີມຂະຫຍາຍບົດບາດຢ່າງຕັ້ງໜ້າທັງໃນລະດັບພາກພື້ນແລະອະນຸພາກພື້ນ ເພື່ອສ້າງປະຊາຄົມຊະຕາກຳທີ່ມີສັນຕິພາບ,ສະຖຽນລະພາບ ແລະ ຮ່ວມກັນຮັບຜົນປະໂຫຍດຈາກຄວາມຈະເລີນຮຸ່ງເຮືອງຂອງພາກພື້ນນີ້.
ທ່ານ ຮຸນແຊນ ກ່າວວ່າ: ກຳປູເຈຍທະໜຸຖະໜົມມິດຕະພາບອັນເປັນມູນເຊື້ອລະຫວ່າງສອງປະເທດ ທັງຍິນດີຮ່ວມກັບຈີນຈັດຕັ້ງປະຕິບັດຄວາມ ເປັນເອກະພາບກັນໃຫ້ດີ,ຮັກສາການໄປມາຫາສູ່ກັນລະຫວ່າງການນຳຂັ້ນສູງ,ເພີ່ມທະວີການຮ່ວມມືລະຫວ່າງສອງຝ່າຍໃນຂົງເຂດຕ່າງໆ,ທັງຍິນດີສືບຕໍ່ຊຸກຍູ້ສາຍພົວພັນລະຫວ່າງອາຊຽນ-ຈີນ ແລະ ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໃຫ້ພັດທະນາເຂົ້າສູ່ລວງເລິກ ແລະ ຮ່ວມກັນປົກປັກຮັກສາສັນຕິພາບ,ສະຖຽນລະພາບ,ການພັດທະນາແລະຄວາມຈະເລີນຮຸ່ງເຮືອງຂອງພາກພື້ນ.
 |
