ຕາມຂ່າວສານຈີນ: ວັນທີ 16 ພຶດສະພານີ້ ຢູ່ຫໍສະພາປະຊາຊົນແຫ່ງຊາດຈີນ, ທ່ານ ສີຈິ້ນຜິງ ປະທານປະເທດຈີນ ໄດ້ພົບປະກັບທ່ານນາງ ອອງຊານຊູຈີ ທີ່ປຶກສາແຫ່ງລັດມຽນມາ ໃນໂອກາດເຂົ້າຮ່ວມກອງປະຊຸມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ຢູ່ຈີນ.
ທ່ານ ສີຈິ້ນຜິງ ຊີ້ໃຫ້ເຫັນວ່າ, ພາຍຫຼັງທ່ານປະທານາທິບໍດີ ທິນຈໍ ສຳເລັດຢ້ຽມຢາມຈີນໃນເດືອນຜ່ານມາ, ສອງຝ່າຍກໍໄດ້ບັນລຸຄວາມເປັນເອກະພາບກັນທີ່ສຳຄັນກ່ຽວກັບການລົງເລິກການຮ່ວມມືຍຸດທະສາດຮອບດ້ານໃນຍຸກສະໄໝໃໝ່. ແນວໃດກໍດີ, ຈີນກໍພ້ອມລົງເລິກການຮ່ວມມືກັບມຽນມາໃຫ້ເປັນຈິງ ທັງຍິນດີ ຊ່ວຍເຫຼືອມຽນມາທີ່ຈຳເປັນໃນຂະບວນການສັນຕິພາບພາຍໃນປະເທດ. ຂະນະດຽວກັນ, ສອງຝ່າຍຄວນຮ່ວມກັນສຸມໃສ່ປົກປັກຮັກສາຄວາມໝັ້ນຄົງແລະສະຖຽນລະພາບຢູ່ຊາຍແດນ ແລະທີ່ສຳຄັນ, ຈີນກໍຍິນດີຮ່ວມກັບມຽນມາເພີ່ມທະວີການຮ່ວມມືພາຍໃຕ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແລະບັນລຸການພັດທະນາຮ່ວມກັນ.
ທ່ານນາງ ອອງຊານຊູຈີ ກ່າວວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຈະນຳເອົາສັນຕິພາບ, ຄວາມປອງດອງ ແລະຄວາມຈະເລີນຮຸ່ງເຮືອງ ມາສູ່ພາກພື້ນ ກໍຄືທົ່ວໂລກ ເຊິ່ງມຽນມາໄດ້ໃຫ້ຄວາມສຳຄັນສູງແລະສຸມໃສ່ລົງເລິກສົ່ງເສີມສາຍພົວພັນສອງປະເທດ. ນອກນີ້ ກໍຂໍຂອບໃຈຈີນທີ່ໄດ້ສະໜັບສະໜູນແລະຊ່ວຍເຫຼືອ ທັງຍິນດີຮ່ວມກັບຈີນສຸມທຸກຄວາມພະຍາຍາມ ປົກປັກຮັກສາສັນຕິພາບແລະສະຖຽນລະພາບຕາມເຂດຊາຍແດນ.
 |
