ວັນທີ19ພຶດສະພານີ້, ການເຈລະຈາສັນຕິພາບຮອບທີ6ກ່ຽວກັບບັນຫາຊີຣີທີ່ຈັດຂຶ້ນຢູ່ເຊີແນວໂດຍອົງການສະຫະປະຊາຊາດເປັນຜູ້ນຳພານັ້ນໄດ້ສິ້ນສຸດລົງ. ການເຈລະຈາສັນຕິພາບຮອບນີ້ບໍ່ໄດ້ເຊັນເອກະສານຜົນງານ. ທ່ານສຕັຟແຟນ ເດ ມິສຕູລາ, ທູດພິເສດຂອງເລຂາທິການໃຫຍ່ສະຫະປະຊາຊາດກ່ຽວກັບບັນຫາຊີຣີໄດ້ກ່າວວ່າ, ການເຈລະຈາຮອບຕໍ່ໄປອາດຈະຈັດຂຶ້ນໃນເດືອນມິຖຸນາປີນີ້.
ໃນກອງປະຊຸມຂ່າວທີ່ຈັດຂຶ້ນຫຼັງການເຈລະຈາ, ທ່ານມິສຕູລາກ່າວວ່າ, ໃນການເຈລະຈາຄັ້ງນີ້, ທຸກຝ່າຍທີ່ເຂົ້າຮ່ວມໄດ້ປຶກສາຫາລືກັນກ່ຽວກັບບັນຫາຕົວຈິງທີ່ບັນດາຝ່າຍສົນໃຈນຳກັນ, ແຕ່ບໍ່ໄດ້ລົງເລິກເຈລະຈາກ່ຽວກັບ4ຫົວຂໍ້ຕົ້ນຕໍ, ຄື ສ້າງລັດຖະບານສາມັກຄີຂອງຊາດ, ປັບປຸງລັດຖະທຳມະນູນ, ຈັດການເລືອກຕັ້ງທົ່ວໄປຄືນໃໝ່, ແລະຕໍ່ຕ້ານການກໍ່ການຮ້າຍ.
ຫຼັງການເຈລະຈາ, ທ່ານບາ ອັນ ຈາຟາຣີ, ຫົວໜ້າຄະນະຜູ້ແທນລັດຖະບານຊີຣີກ່າວຕໍ່ສື່ມວນຊົນວ່າ, ການເຈລະຈາຄັ້ງນີ້ບໍ່ໄດ້ກ່າວເຖິງ4ຫົວຂໍ້ຫຼັກແມ່ນແຕ່ໜ້ອຍ. ທ່ານນາສ ອັນ ຮາຣີຣີ, ຫົວໜ້າຜູ້ເຈລະຈາຂອງຄະນະກຳມະການເຈລະຈາຊັ້ນສູງຝ່າຍຄ້ານຕົ້ນຕໍຂອງຊີຣີກ່າວວ່າ, ການເຈລະຈາຄັ້ງນີ້ບໍ່ໄດ້ຮັບຄວາມຄືບໜ້າຫຍັງ, ຂະນະທີ່ທ່ານກ່າວຕື່ມວ່າ, ເຖິງເປັນແນວນີ້ກໍຕາມ, ແຕ່ການທີ່ທຸກຝ່າຍສາມາດດຳເນີນການເຈລະຈາກ່ຽວກັບການແກ້ໄຂບັນຫາຊີຣີດ້ວຍວິທີທາງການເມືອງຢູ່ເຊີແນວນັ້ນເອງກໍມີຄວາມໝາຍອັນສຳຄັນ.
 |
