ວັນທີ 20 ພຶດສະພານີ້ ພາກສ່ວນຊອກຫາກອບກູ້ອິນໂດເນເຊຍຢືນຢັນວ່າ, ຢູ່ເຂດທະເລໃກ້ກັບແຂວງຈາວາຕາເວັນອອກຂອງອິນໂດເນເຊຍໄດ້ເກີດເຫດການໄຟໄໝ້ເທິງກຳປັ່ນໃນວັນທີ 19 ພຶດສະພານີ້, ມາຮອດປະຈຸບັນເຮັດໃຫ້ 5 ຄົນເສຍຊີວິດ, ແລະຫຼາຍສິບຄົນຫາຍສາບສູນ.
ໃນເວລາໃຫ້ສຳພາດ ທ່ານມຸຮາມັດ ອາຣິຟິນ ຜູ້ຮັບຜິດຊອບຫ້ອງການຊອກຫາກອບກູ້ແຂວງຈາວາຕາເວັນອອກກ່າວວ່າ,ໃນຕອນບ່າຍວັນທີ 19 ພຶດສະພານີ້, ມີກຳປັ່ນລຳໜຶ່ງທີ່ບັນທຸກຜູ້ໂດຍສານ 178 ຄົນແລະລົດຍົນຫຼາຍສິບຄັນ ໄດ້ເກີດໄຟໄໝ້ໃນກາງທາງຈາກສຸຣະບາຢາແຂວງຈາວາຕາເວັນອອກໄປສູ່ກາລິກພາພັນແຂວງຄາລິມານຕັນຕາເວັນອອກ. ຍ້ອນດັບເພີງຍາກ, ຫົວໜ້າກຳປັ່ນຈຶ່ງຮຽກຮ້ອງໃຫ້ຜູ້ໂດຍສານຂີ່ເຮືອກອບກູ້ເພື່ອລອດຊີວິດ. ພະນັກງານກອບກູ້ໄດ້ພົບເຫັນ 5 ສົບຂອງຜູ້ປະສົບເຄາະຮ້າຍ, ແລະໄດ້ຊ່ວຍເຫຼືອ 137 ຄົນຢ່າງສຳເລັດຜົນ. ປັດຈຸບັນ ອົງການທີ່ກ່ຽວຂ້ອງກຳລັງຢືນຢັນລາຍຊື່ຜູ້ໂດຍສານແລະຈຳນວນຄົນຫາຍສາບສູນ.
ຕາມສື່ມວນຊົນທ້ອງຖິ່ນລາຍງານວ່າ, ເຫດການດັ່ງກ່າວນີ້ອາດຈະເກີດຂຶ້ນຍ້ອນລົດຍົນຢູ່ເທິງກຳປັ່ນເກີດໄຟໄໝ້. ແນວໃດກໍດີ, ເຈົ້າໜ້າທີ່ຕຳຫຼວດໄດ້ເລີ່ມສືບສວນເຫດການຄັ້ງນີ້.