ທ່ານເອີໂດກັນໄດ້ຮັບເລືອກຕັ້ງເປັນປະທານພັກກຳອຳນາດຕວກກີຄືນໃໝ່

ຂ່າວສານອານາໂດລູຕວກກີລາຍງານວ່າ: ກອງປະຊຸມສະໄໝວິສາມັນຂອງພັກຍຸຕິທຳແລະການພັດທະນາຕວກກີໄດ້ໄຂຂຶ້ນຢູ່ນະຄອນຫຼວງອັງກາຣາ ເພື່ອເລືອກຕັ້ງປະທານພັກຄົນໃໝ່ໂດຍທ່ານເອີໂດກັນ ປະທານາທິບໍດີທີ່ເປັນຜູ້ສະໝັກໜຶ່ງດຽວໄດ້ຮັບສຽງສະໜັບສະໜູນຈາກ 1414 ຄົນຂອງຜູ້ແທນທັງໝົດ 1470 ຄົນ.

ທ່ານເອີໂດກັນໄດ້ສ້າງຕັ້ງພັກຍຸຕິທຳແລະການພັດທະນາຂຶ້ນເມື່ອປີ 2001 ທັງເປັນປະທານພັກ. ຫຼັງໄດ້ຮັບເລືອກຕັ້ງເປັນປະທານາທິບໍດີຕວກກີເມື່ອເດືອນສິງຫາ 2014, ທ່ານເອີໂດກັນໄດ້ສະຫຼະຕຳແໜ່ງປະທານພັກໂດຍປະຕິບັດຕາມຫຼັກການເປັນກາງຂອງພັກກຳອຳນາດທີ່ກຳນົດໄວ້ໃນລັດຖະທຳມະນູນ. ແນວໃດກໍດີ,ຫຼັງຕວກກີໄດ້ຈັດການລົງປະຊາມະຕິແລະຮັບຮອງເອົາການດັດແກ້ລັດຖະທຳມະນູນດ້ວຍການຍົກເລີກຫຼັກການດັ່ງກ່າວໂດຍອະນຸຍາດໃຫ້ປະທານາທິບໍດີສາມາດດຳລົງຕຳແໜ່ງພັກກຳອຳນາດໄດ້ແລະຈາກນີ້, ໃນວັນທີ 2 ພຶດສະພານີ້, ທ່ານເອີໂດກັນຈຶ່ງໄດ້ກັບເຂົ້າມາເປັນສະມາຊິກພັກແລະໄດ້ຮັບເລືອກຕັ້ງເປັນປະທານພັກດັ່ງກ່າວຄືນໃໝ່.