ກິດຈະກຳໂຄສະນາເຜີຍແຜ່ "ລະດູການແຫ່ງການວາງສະແດງວັດທະນະທຳລະຄອນໂທລະພາບໄທປີ 2017" ໄດ້ຈັດຂຶ້ນຢູ່ເມືອງນານນິງເຂດປົກຄອງຕົນເອງເຜົ່າຈວ້າງກວາງຊີຈີນໃນວັນທີ 20 ພຶດສະພານີ້. ທ່ານ ໄຊຣັດ ພອນທິບວະຣາເວດ ກົງສຸນໃຫຍ່ຂອງສະຖານກົງສຸນໃຫຍ່ໄທປະຈຳເມືອງນານນິງກ່າວວ່າ: ການຮ່ວມມືລະຫວ່າງຈີນກັບໄທໃນຂົງເຂດລະຄອນໂທລະພາບແລະຮູບເງົາກໍຄືຂົງເຂດວັດທະນະທຳອື່ນໆນັບມື້ນັບແໜ້ນແຟ້ນ ເຊິ່ງເຂດກວາງຊີກໍພວມຊຸກຍູ້ການແລກປ່ຽນແລະການຮ່ວມມືກັບໄທທັງລະຄອນໂທລະພາບແລະຮູບເງົາ, ຮູບເງົາເອກະສານ,ສາລະຄະດີແລະອື່ນໆ.
ໃນຊຸມປີຜ່ານມາ, ເຂດກວາງຊີໄດ້ນຳເອົາລະຄອນໂທລະພາບຂອງໄທຫຼາຍສິບເລື່ອງ,ທັງໄດ້ແປລະຄອນໂທລະພາບແລະຮູບເງົາຈີນເປັນພາສາໄທ ແລະແຜ່ພາບອອກອາກາດຢູ່ສະຖານີໂທລະພາບໄທ. ປັດຈຸບັນ, ລະຄອນໂທລະພາບຂອງຈີນເລື່ອງ "ແຟນທີ່ບໍ່ມີເງິນຄຳຫຼາຍຂອງຂ້ອຍ", "ແພດໝໍປັກກິ່ງ" ແລະອື່ນໆຈະໄດ້ແລະພວມແຜ່ພາບອອກອາກາດຢູ່ປະເທດໄທແລ້ວ ເຊິ່ງແປໂດຍຄະນະແປພາສາຂອງໄທ ແລະ ພາກໂດຍນັກສະແດງລະຄອນໂທລະພາບແລະຮູບເງົາໄທ; ສຳລັບຮູບເງົາເອກະສານເລື່ອງໃຫຍ່ "ບ້ານຢູ່ທ່າມກາງພູແລະນ້ຳຂຽວສະອາດ" ທີ່ຈີນແລະໄທຮ່ວມກັນຖ່າຍທຳພວມຢູ່ໃນການຜະລິດ ໂດຍຄາດວ່າຈະແຜ່ພາບອອກອາກາດຢູ່ສອງປະເທດໃນປີນີ້.