ຕາມຂ່າວສານຊິນຮວາ: ທ່ານຈິນຢວນ ທີ່ປຶກສາເສດຖະກິດການຄ້າສະຖານທູດຈີນປະຈຳຟິລິບປິນກ່າວໃນໂອກາດຫາລືລະຫວ່າງນັກທຸລະກິດຈີນ(ກວາງຊີ)-ຟິລິບປິນໃນວັນທີ 24 ພຶດສະພານີ້ວ່າ,ໄຕມາດທຳອິດປີນີ້ຈີນໄດ້ກາຍເປັນຄູ່ຄ້າໃຫຍ່ອັນດັບໜຶ່ງຂອງປະເທດຟິລິບປິນ.
ທ່ານຈິນຢວນກ່າວວ່າ,ນັບແຕ່ທ່ານໂຣດຣິໂກ ດູເຕິເຕ ປະທານາທິບໍດີຟີລີບປີນຢ້ຽມຢາມຈີນເມື່ອເດືອນຕຸລາປີຜ່ານມາ,ຈີນ-ຟິລິບປິນປະສົບຜົນສຳເລັດໃນການຮ່ວມມືດ້ານເສດຖະກິດການຄ້າໂດຍເຫັນໄດ້ໃນໄຕມາດທຳອິດປີນີ້,ມູນຄ່າການຄ້າລະຫວ່າງສອງປະເທດໄດ້ເພີ່ມຂຶ້ນຫຼາຍກວ່າໄລຍະດຽວກັນຂອງປີຜ່ານມາເຖິງ 26%.ຂະນະດຽວກັນ,ຟິລິບປິນສົ່ງອອກສິນຄ້າກະສິກຳມາຈີນກໍໄດ້ເພີ່ມຂຶ້ນຢ່າງຫຼວງຫຼາຍ.
ທ່ານກ່າວຕື່ມວ່າ,ທ້າຍເດືອນມັງກອນປີນີ້,ຢູ່ປັກກິ່ງ,ເຈົ້າໜ້າທີ່ລະດັບສູງທີ່ຮັບຜິດຊອບວຽກງານເສດຖະກິດຂອງຟິລິບປິນໄດ້ປຶກສາຫາລືແລະຕົກລົງກັບຈີນກ່ຽວກັບໂຄງການລະບາຍນ້ຳ,ເຂື່ອນໄຟຟ້າແລະທາງລົດໄຟທັງໄດ້ສະເໜີໃຫ້ຈີນສະໜັບສະໜູນເງິນກູ້ດອກເບ້ຍຕ່ຳ,ມູນຄ່າທີ່ວິສາຫະກິດຈີນຮັບເໝົາໂຄງການຢູ່ຟິລິບປິນກໍບັນລຸຫຼາຍກວ່າ 13 ຕື້ໂດລາສະຫະລັດແລ້ວ.ປີຜ່ານມາ,ຈີນໄດ້ກາຍເປັນແຫຼ່ງນັກທ່ອງທ່ຽວຕ່າງປະເທດໃຫຍ່ອັນດັບ 3 ຂອງຟິລິບປິນ,ແລະຄາດວ່າປີນີ້ນັກທ່ອງທ່ຽວຈີນຈະໄປທ່ຽວຟິລິບປິນເຖິງ 1 ລ້ານເທື່ອຄົນ.