ຕາມຂ່າວສານຊິ່ນຮວາ: ກອງກຳປັ່ນຢ້ຽມຢາມທາງໄກຂອງທະຫານເຮືອຈີນໄດ້ສິ້ນສຸດການຢ້ຽມຢາມສັນທະວະໄມຕີຕໍ່ບັງກະລາເດັດ, ແລະລາອອກຈາກທ່າກຳປັ່ນຈີທາກົງໃນວັນທີ 26 ພຶດສະພານີ້ຕາມເວລາທ້ອງຖິ່ນ, ເດີນທາງໄປຢ້ຽມຢາມສັນທະວະໄມຕີຕໍ່ສີລັງກາ.
ເມື່ອກອງກຳປັ່ນອອກຈາກທ່າກຳປັ່ນແລ້ວ, ໄດ້ຈັດການຊ້ອມຮົບຮ່ວມທາງທະເລກັບທະຫານເຮືອບັງກະລາເດັດ. ການຊ້ອມຮົບລວມທັງ ການເຕົ້າໂຮມກັນຂອງກອງກຳປັ່ນ, ການເດີນເຮືອຮ່ວມ, ການສະໜັບສະໜູນກັນ, ການຄົ້ນຫາກອບກູ້ຮ່ວມແລະອື່ນໆ. ໃນການຊ້ອມຮົບ, ກອງບັນຊາການຂອງກອງກຳປັ່ນຢ້ຽມຢາມທາງໄກທະຫານເຮືອຈີນໄດ້ຮັບຜິດຊອບການບັນຊາການໂດຍລວມ, ຝ່າຍຈີນຍັງໄດ້ໃຊ້ຍົນເຮລິກົບເຕລຳໜຶ່ງໃນການຊ້ອມຮົບ, ສອງຝ່າຍໄດ້ສົ່ງນັກສັງເກດການໄປສຶກສາຮ່ຳຮຽນຢູ່ຝ່າຍກົງກັນຂ້າມ.
ທ່ານເສີນຮ້າວ ຜູ້ບັນຊາການຂອງກອງກຳປັ່ນຢ້ຽມຢາມທາງໄກທະຫານເຮືອຈີນກ່າວວ່າ, ການຊ້ອມຮົບຮ່ວມທາງທະເລເທື່ອນີ້ ແມ່ນການຊ້ອມຮົບທີ່ມີເນື້ອໃນຊ້ອມຮົບຫຼາຍທີ່ສຸດ, ໃຊ້ເວລາດົນທີ່ສຸດ, ມີຂອບເຂດແລກປ່ຽນກວ້າງຂວາງທີ່ສຸດ ລະຫວ່າງທະຫານເຮືອສອງປະເທດຈີນແລະບັງກະລາເດັດ. ຜ່ານການຊ້ອມຮົບເທື່ອນີ້, ສອງຝ່າຍໄດ້ຍົກສູງຄວາມສາມາດດ້ານບັນຊາການຮ່ວມແລະປະສານງານກັນຕື່ມອີກ, ແລະໄດ້ລົງເລິກຄວາມໄວ້ເນື້ອເຊື່ອໃຈແລະການຮ່ວມມືລະຫວ່າງທະຫານເຮືອສອງປະເທດ.