ຕາມຂ່າວCRI: ໜ່ວຍງານທີ່ກ່ຽວຂ້ອງທາງການອີຣານຢືນຢັນໃນວັນທີ 30 ພຶດສະພານີ້ວ່າ: ຈາກຜົນສຳເລັດໃນການເລືອກຕັ້ງທົ່ວໄປຂອງປະເທດຕົນໃນວັນທີ 19 ເດືອນດຽວກັນໂດຍທ່ານ ຮັດຊັນ ຣຸຮານີ ປະທານາທິບໍດີທີ່ຊະນະເລືອກຕັ້ງນັ້ນ, ທ່ານຈະເຂົ້າພິທີສາບານຕົວຂຶ້ນຮັບຕຳແໜ່ງປະທານາທິບໍດີອີກວາລະໜຶ່ງໃນເດືອນສິງຫາປີນີ້.
ທ່ານ ອາຮາມັດ ຟາຣາຮານີ ສະມາຊິກຄະນະປະທານລັດຖະສະພາອີຣານກ່າວວ່າ: ພິທີສາບານຕົວຂຶ້ນຮັບຕຳແໜ່ງຂອງທ່ານ ສຸຮານີ ຈະຈັດຂຶ້ນ ຫຼັງໄດ້ຮັບການຢັ້ງຢືນຈາກທ່ານ ອາຢາໂຕນລາຮ໌ ເຊເຢັດ ອາລີ ຄາເມເນ ຜູ້ນຳສູງສຸດອີຣານແລ້ວ 4-5 ວັນແລະຫຼັງຈາກສາບານຕົວຂຶ້ນຮັບຕຳແໜ່ງແລ້ວ, ທ່ານຕ້ອງໄດ້ສະເໜີລາຍຊື່ຄະນະລັດຖະບານຊຸດໃໝ່ຕໍ່ລັດຖະສະພາພາຍໃນສອງອາທິດ.ຂະນະທີ່ລັດຖະສະພາອີຣານຈະກວດສອບລາຍຊື່ດັ່ງກ່າວໃນເວລາ 1 ອາທິດແລະຈະລົງຄະແນນສຽງໄວ້ວາງໃຈເປັນຂັ້ນສຸດທ້າຍ.
ໃນການເລືອກຕັ້ງນັ້ນ, ທ່ານ ຮັດສ໌ຊັນ ຣຸຮານີ ໄດ້ຮັບຄະແນນສຽງ 23 ລ້ານກວ່າຄະແນນເຊິ່ງກວມເອົາ 57% ຈາກຜູ້ມີສິດເລືອກຕັ້ງທັງໝົດ 41 ລ້ານກວ່າຄົນ ແລະຈະດຳລົງຕຳແໜ່ງປະທານາທິບໍດີອີກວາລະໜຶ່ງ.
 |
