ຕອນຂ້ອນແຈ້ງວັນທີ 4 ມິຖຸນານີ້ ຕາມເວລາທ້ອງຖິ່ນ, ເຈົ້າໜ້າທີ່ຕຳຫຼວດອັງກິດກ່າວວ່າ: ເຫດການໂຈມຕີແບບກໍ່ການຮ້າຍສອງເທື່ອທີ່ເກີດຂຶ້ນຢູ່ນະຄອນຫຼວງລອນດອນຂອງອັງກິດໃນຕອນຄ່ຳວັນທີ 3 ມິຖຸນານີ້ ໄດ້ເຮັດໃຫ້ 6 ຄົນເສຍຊີວິດ, ຕຳຫຼວດໄດ້ຍິງຜູ້ຕ້ອງຫາ 3 ຄົນຕາຍ.
ຕຳຫຼວດອັງກິດອອກຖະແຫຼງການວ່າ: ມີຕຳຫຼວດຜູ້ໜຶ່ງໄດ້ຮັບບາດເຈັບໜັກໃນເວລາແກ້ໄຂເຫດການ. ນອກນີ້,ສື່ມວນຊົນອັງກິດລາຍງານວ່າ: ໄດ້ສົ່ງຜູ້ໄດ້ຮັບບາດເຈັບຢ່າງໜ້ອຍ 20 ຄົນໄປປິ່ນປົວຢູ່ໂຮງໝໍ,ແຕ່ຕຳຫຼວດຍັງບໍ່ທັນໃຫ້ຄຳຢືນຢັນເທື່ອ.
ຕອນຄ່ຳວັນທີ 3 ມິຖຸນານີ້,ຢູ່ຂົວລອນດອນ, ຕະຫຼາດແຫ່ງໜຶ່ງທີ່ຢູ່ໃກ້ຂົວລອນດອນແລະວອັກສ໌ຮໍທີ່ຢູ່ພາກຕາເວັນຕົກສຽງໃຕ້ຂອງລອນດອນໄດ້ເກີດເຫດການທຳລາຍຄວາມສະຫງົບ 3 ເທື່ອ, ໃນນັ້ນ,ລວມທັງເຫດການທີ່ລົດຂົນສົ່ງສິນຄ້າຄັນໜຶ່ງຕຳຄົນກຳລັງຍ່າງຢູ່ເທິງຂົວລອນດອນ. ປະຈຸບັນ, ຕຳຫຼວດອັງກິດໄດ້ກຳນົດເຫດການສອງເທື່ອທີ່ເກີດຂຶ້ນກ່ອນເປັນການໂຈມຕີແບບກໍ່ການຮ້າຍ, ເຫດການທີ່ເກີດຂຶ້ນຢູ່ວອັກສ໌ຮໍເປັນເຫດການທີ່ທຳຮ້າຍຜູ້ອື່ນດ້ວຍມີດ,ບໍ່ມີສ່ວນກ່ຽວພັນເຖິງເຫດການອີກສອງລາຍ.
ອັງກິດຈະຈັດການເລືອກຕັ້ງໃນວັນທີ 8 ມິຖຸນານີ້. ທ່ານນາງເທີເຣຊາ ມາຣີ ເມ ນາຍົກລັດຖະມົນຕີອັງກິດທີ່ກຳລັງແຂ່ງຂັນຮັບການເລືອກຕັ້ງຢູ່ຕ່າງແຂວງໄດ້ກັບຄືນສູ່ສຳນັກງານນາຍົກລັດຖະມົນຕີທີ່ລອນດອນໂດຍດ່ວນໃນຕອນຄ່ຳວັນທີ 3 ມິຖຸນານີ້. ນາງໄດ້ໃຊ້ຄຳສັບ"terrible"ມາບັນລະຍາຍເຫດການທີ່ເກີດຂຶ້ນໃນຕອນຄ່ຳມື້ດຽວກັນ,ແລະຈະຮັບມືໂດຍຖືເຫດການແບບນີ້ເປັນ"ການກໍ່ການຮ້າຍທີ່ບົ່ມຊ້ອນ".
ປະຈຸບັນ, ສະຖານທູດຈີນປະຈຳອັງກິດກຳລັງຕິດຕາມສະພາບການຂອງເຫດການດັ່ງກ່າວຢ່າງໃກ້ຊິດ,ຍັງບໍ່ມີການລາຍງານວ່າມີຄົນຈີນເສຍຊີວິດຫຼືໄດ້ຮັບບາດເຈັບໃນເຫດການດັ່ງກ່າວ.