ຕາມຂ່າວCRI: ວັນທີ 5 ມິຖຸນານີ້, ທ່ານນາງ ລີວຮຸ້ຍ ຮອງປະທານຄະນະກຳມະການວຽກງານຊົນເຜົ່າປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ດິງເກວຮາຍ ຮອງປະທານຄະນະກຳມະການວຽກງານຊົນເຜົ່າຫວຽດນາມພ້ອມຄະນະຢູ່ນະຄອນຫຼວງປັກກິ່ງໃນໂອກາດເດີນທາງຢ້ຽມຢາມ ສປ ຈີນ.
ທ່ານນາງ ລີວຮຸ້ຍ ກ່າວວ່າ:ຈີນແລະຫວຽດນາມລ້ວນແຕ່ແມ່ນປະເທດທີ່ມີຫຼາຍຊົນເຜົ່າ,ລັດຖະບານຂອງສອງປະເທດມີທັດສະນະວຽກງານຊົນເຜົ່າຄ້າຍຄືກັນ. ຂະນະດຽວກັນທັງ 2 ຄະນະກຳມະການກໍໄດ້ຮັກສາການພົວພັນການແລກປ່ຽນດ້ວຍນ້ຳໃຈໄມຕີຈິດມິດຕະພາບແລະການຮ່ວມມືທີ່ແທ້ຈິງແຕ່ໃດໆມາ ແລະການຮ່ວມມືກໍປະສົບຜົນສຳເລັດຢ່າງຫຼວງຫຼາຍ. ໃນແຕ່ລະປີ ນັບແຕ່ປີ 2015 ເປັນຕົ້ນມາ, ຄະນະກຳມະການວຽກງານຊົນເຜົ່າປະເທດຈີນແລະກະຊວງການຄ້າຈີນໄດ້ຮ່ວມກັນຈັດ "ຊຸດອົບຮົມການຈັດຕັ້ງປະຕິບັດນະໂຍບາຍຊົນເຜົ່າຂອງປະເທດ" ໜຶ່ງຊຸດ, ຫວຽດນາມກໍໄດ້ສົ່ງພະນັກງານເຂົ້າຮ່ວມ. ແນວໃດກໍດີຫວັງວ່າຄະນະກຳມະການຂອງສອງປະເທດຈະສືບຕໍ່ເພີ່ມທະວີການແລກປ່ຽນບົດຮຽນແລະການຮ່ວມມືທີ່ແທ້ຈິງໃນການພັດທະນາຊັບພະຍາກອນມະນຸດໃນອະນາຄົດ.
ທ່ານ ດິງເກວຮາຍ ຢືນຢັນວ່າ: ຈະເພີ່ມທະວີການຮ່ວມມືກັບຄະນະກຳມະການຊົນເຜົ່າປະເທດຈີນ,ເພີ່ມທະວີນ້ຳໃຈມິດຕະພາບແລະຄວາມໄວ້ເນື້ອເຊື່ອໃຈເຊິ່ງກັນແລະກັນ.