ຕາມຂ່າວສານຊິນຮວາ: ຜົນການສຳຫຼວດຄວາມເຫັນປະຊາຊົນທີ່ເປີດເຜີຍໃນຕອນຄ່ຳວັນທີ 8 ມິຖຸນານີ້ຕາມເວລາທ້ອງຖິ່ນຊີ້ໃຫ້ເຫັນວ່າ, ພັກອະນຸລັກນິຍົມທີ່ນຳໂດຍທ່ານນາງ ເທເລຊາ ເມ ນາຍົກລັດຖະມົນຕີອັງກິດ ມີຄະແນນນຳໃນການເລືອກຕັ້ງທົ່ວໄປຂອງປະເທດຕົນທີ່ຈັດຂຶ້ນໃນມື້ດຽວກັນ ແລະບໍ່ມີພັກໃດໄດ້ຮັບບ່ອນນັ່ງຫຼາຍກວ່າເຄິ່ງໜຶ່ງ ເຊິ່ງໝາຍຄວາມວ່າ, ຈະເກີດມີ "ລັດຖະສະພາທີ່ບໍ່ມີສຽງຖ້ວມທົ້ນ" ອີກເທື່ອໜຶ່ງ ຢູ່ອັງກິດ.
Sky TV ອັງກິດ ໄດ້ເປີດເຜີຍຜົນການສຳຫຼວດຄວາມເຫັນຂອງປະຊາຊົນທີ່ຈັດຂຶ້ນຢູ່ໜ້າໜ່ວຍເລືອກຕັ້ງວ່າ, ໃນສະພາຕ່ຳ, ພັກອະນຸລັກນິຍົມ ໄດ້ 314 ບ່ອນນັ່ງ, ພັກກຳມະກອນ ໄດ້ 266 ບ່ອນນັ່ງ, ພັກຊົນຊາດສະກອດແລນ ໄດ້ 34 ບ່ອນນັ່ງ, ພັກເສລີປະຊາທິປະໄຕ ໄດ້ 14 ບ່ອນນັ່ງ ແລະຈາກພັກນ້ອຍອີກຈຳນວນໜຶ່ງກໍໄດ້ເຂົ້າໄປນັ່ງໃນສະພາເຊັ່ນດຽວກັນ.
ປັດຈຸບັນ ຢູ່ໃນໄລຍະການນັບຄະແນນ ແລະຄາດວ່າຈະປະກາດຜົນການນັບຄະແນນສຸດທ້າຍໃນວັນທີ 9 ມິຖຸນານີ້. ແນວໃດກໍດີ, ທາງການອັງກິດປະກາດວ່າ ມີຜູ້ມີສິດເລືອກຕັ້ງໄປລົງຄະແນນສຽງໃນການເລືອກຕັ້ງທົ່ວໄປຄັ້ງນີ້ກວມ 63,5%.