ສັບປະດາໂຄສະນາເຜີຍແຜ່ການປະຢັດພະລັງງານທົ່ວປະເທດ ແລະ ກິດຈະກຳວັນກາກບອນດີອອກຊິດຕ່ຳທົ່ວປະເທດປີ 2017 ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 11 ມິຖຸນານີ້ ແລະໃນໂອກາດດັ່ງກ່າວ,ທ່ານ ຈ່າງໂຢງ ຮອງປະທານຄະນະກຳມະການພັດທະນາແລະປະຕິຮູບແຫ່ງລັດຈີນກ່າວໃນພິທີໄຂວ່າ: ນັບແຕ່ປີ 2005 ຫາປີ 2016, ໂດຍລວມແລ້ວ,ການສິ້ນເປືອງພະລັງງານສະເລ່ຍຕໍ່ຫົວໜ່ວຍ GDP ຂອງຈີນໄດ້ຫຼຸດລົງ 37,3% ທັງສາມາດປະຢັດພະລັງງານຖ່ານຫີນໄດ້ 1 ຕື້ 800 ລ້ານໂຕນ, ເຊິ່ງກໍໝາຍຄວາມວ່າສາມາດຫຼຸດການລະບາຍກາກບອນດີອອກຊິດໄດ້ປະມານ 4 ຕື້ໂຕນ, ອັດຕາການອາໄສພະລັງງານເພື່ອການເຕີບໂຕຂອງເສດຖະກິດໄດ້ຕ່ຳລົງຢ່າງຈະແຈ້ງ. ຈາກນີ້,ຈີນຈຶ່ງເປັນປະເທດທີ່ໄດ້ປະກອບສ່ວນປະຢັດພະລັງງານໃຫຍ່ທີ່ສຸດຢູ່ໃນໂລກ ແລະປະກອບສ່ວນເສີມຂະຫຍາຍບົດບາດທີ່ສຳຄັນໃນການຫັນປ່ຽນຮູບແບບກາກບອນດີອອກຊິດຕ່ຳແບບສີຂຽວຂອງໂລກຕື່ມອີກ.
ປັດຈຸບັນ, ຈີນພວມຍົກລະດັບການຕີລາຄາແລະກວດກາຄວາມຮັບຜິດຊອບຕໍ່ເປົ້າໝາຍການປະຢັດພະລັງງານ ທັງປັບປຸງກົດໝາຍຂໍ້ກຳນົດກ່ຽວກັບພະລັງງານແລະການປະຢັດພະລັງງານໃຫ້ດີຂຶ້ນ, ຂະນະທີ່ໃນຕໍ່ໜ້າ,ຈະເລັ່ງຊຸກຍູ້ຮູບແບບການຜະລິດໃຫ້ຫັນເປັນແບບສີຂຽວ,ນຳພາການສ້າງວິທີການບໍລິໂພກທີ່ມີກາກບອນດີອອກຊິດຕ່ຳແລະເປັນແບບສີຂຽວ.
 |
