ຕາມຂ່າວສານຊິນຮວາ: ໄດ້ເກີດແຜ່ນດິນໄຫວຢູ່ເຂດທະເລພາກໃຕ້ແຂວງຊະວາຕາເວັນຕົກປະເທດອິນໂດເນເຊຍໃນລະດັບ 6,3 ຣິເຕີໃນຕອນເຊົ້າວັນທີ 12 ມິຖຸນານີ້ຂະນະທີ່ປັດຈຸບັນຍັງບໍ່ທັນມີລາຍງານຜູ້ເສຍຊີວິດຫຼືບາດເຈັບແລະຄວາມເສຍຫາຍຕໍ່ຊັບສິນເທື່ອ.
ເວັບໄຊກົມອຸຕຸນິຍົມ,ດິນຟ້າອາກາດແລະຟິຊິກໜ່ວຍໂລກຂອງປະເທດດັ່ງກ່າວລາຍງານວ່າ,ແຜ່ນດິນໄຫວເກີດຂຶ້ນໃນເວລາ 6 ໂມງ 15 ນາທີຕາມເວລາທ້ອງຖິ່ນໂດຍໃຈກາງແຜ່ນດິນໄຫວຢູ່ເຂດທະເລຈາກເມືອງຊູກາມູນີແຂວງຊະວາຕາເວັນຕົກໄປທາງທິດຕາເວັນຕົກສຽງໃຕ້ 179 ກິໂລແມັດຫ່າງຈາກບັນດຸງເທດສະບານແຂວງປະມານ 207 ກິໂລແມັດແລະແຫຼ່ງແຜ່ນດິນໄຫວເລິກລົງ 10 ກິໂລແມັດ.ແນວໃດກໍດີ,ພາກສ່ວນຕິດຕາມວັດແທກແຜ່ນດິນໄຫວຂອງປະເທດດັ່ງກ່າວຍັງບໍ່ທັນເຕືອນໄພຄຶ້ນຊຶນາມີເທື່ອ.
ກົມວັດແທກທໍລະນີອາເມລິກາແທກໄດ້ລະດັບແຜ່ນດິນໄຫວເທື່ອນີ້ຢູ່ໃນລະດັບ 5,6 ຣິເຕີແລະມີແຫຼ່ງແຜ່ນດິນໄຫວເລິກລົງ 10 ກິໂລແມັດ.