ວັນທີ 15 ມິຖຸນານີ້, ວຸດທິສະພາອາເມລິກາໄດ້ລົງຄະແນນສຽງຮັບຮອງຍັດຕິຂວ້ຳບາດອີຣານລວມທັງຍັດຕິສະບັບດັດແກ້ຂວ້ຳບາດຣັດເຊຍ ແລະຈາກນີ້ກໍຈະໃຫ້ສະພາຕ່ຳພິຈາລະນາໃນຂັ້ນຕໍ່ໄປ.
ສຳລັບຍັດຕິສະບັບດັດແກ້ລະບຸວ່າ: ອາເມລິກາຈະຂວ້ຳບາດຊາວຣັດເຊຍກຸ່ມໜຶ່ງຫຼັງບຸກຄົນເຫຼົ່ານີ້ມີສ່ວນກ່ຽວຂ້ອງກັບການລ່ວງລະເມີດສິດທິມະນຸດ,ທັງຖືກສົງໄສມີສ່ວນກ່ຽວຂ້ອງກັບການສໍ້ລາດບັງຫຼວງ,ການສະໜອງອາວຸດໃຫ້ແກ່ລັດຖະບານຊີຣີ ແລະຊ່ວຍລັດຖະບານຣັດເຊຍໂຈມຕີທາງອິນເຕີເນັດ ກໍຄືມີການພົວພັນດ້ານການຄ້າກັບໜ່ວຍປ້ອງກັນຫຼືໜ່ວຍຂ່າວລັບຣັດເຊຍແລະອື່ນໆ. ນອກນີ້, ເມື່ອປະທານາທິບໍດີອາເມລິກາມີຫວັງຫຼຸດຜ່ອນຫຼືຢຸດຕິການຂວ້ຳບາດທີ່ມີຢູ່ໃນປັດຈຸບັນຕໍ່ຣັດເຊຍ, ລັດຖະສະພາກໍສາມາດດຳເນີນຂັ້ນຕອນພິຈາລະນາຕາມຍັດຕິສະບັບດັດແກ້ດັ່ງກ່າວ.
ຍັດຕິທີ່ໄດ້ຮັບຮອງຈາກວຸດທິສະພາອາເມລິກາໃນວັນທີ 15 ມິຖຸນານີ້ໃນເບື້ອງຕົ້ນເປັນພຽງແຕ່ເນື້ອໃນການຂວ້ຳບາດອີຣານເທົ່ານັ້ນ, ແຕ່ໂຕຈິງໄດ້ເອົາມາດຕະການຂວ້ຳບາດຣັດເຊຍຕື່ມເຂົ້າໃນຍັດຕິການຂວ້ຳບາດອີຣານດ້ວຍຮູບແບບການດັດແກ້ຍັດຕິ ເພື່ອຈະໄດ້ຮັບການສະໜັບສະໜູນຈາກທຳນຽບຂາວໃຫ້ຫຼາຍກວ່າເກົ່າ.