ເຈົ້າໜ້າທີ່ກອງທັບອີຣັກປະກາດໃນວັນທີ 18 ມິຖຸນານີ້ວ່າ: ກອງທັບລັດຖະບານໄດ້ເປີດບັ້ນໂຈມຕີທີ່ໝັ້ນແຫ່ງສຸດທ້າຍຂອງກຸ່ມຫົວຮຸນແຮງ IS ຢູ່ເມືອງໂມຊຸນ ຕົວເມືອງໃຫຍ່ອັນດັບສອງຂອງປະເທດໃນວັນດັ່ງກ່າວ.
ທັງນີ້, ທ່ານອັບດຸນ ອາມີ ຢາຣາລາ ໂຄສົກກອງບັນຊາການການເຄື່ອນໄຫວປະສົມກອງທັບອີຣັກ ໄດ້ອອກຖະແຫຼງການວ່າ: ກອງກຳລັງປະກອບອາວຸດອີຣັກ ລວມທັງກອງກຳລັງຕ້ານການກໍ່ການຮ້າຍ ແລະ ກອງຕຳຫຼວດສະຫະພັນ ໄດ້ເປີດການໂຈມຕີຂັ້ນຕັດສິນຊີ້ຂາດຈາກເຂດຕາເວັນຕົກເມືອງໂມຊຸນໄປສູ່ເຂດໃຈກາງເມືອງເກົ່າໃນວັນດັ່ງກ່າວ ເພື່ອດັບສູນກຳລັງເສດເຫຼືອຂອງ IS ທີ່ຄວບຄຸມເຂດເມືອງດັ່ງກ່າວ.
ຖະແຫຼງການຍັງລະບຸວ່າ: ກອງທັບລັດຖະບານໄດ້ໂຈມຕີເຂົ້າເຂດໃຈກາງເມືອງເກົ່າທັງສາມທິດ ນັບແຕ່ເວລາ 6:00 ໂມງຂອງວັນທີ 18 ມິຖຸນານີ້ເປັນຕົ້ນໄປ.