ສະຫະພາບອາຟຣີກາຮຽກຮ້ອງໃຫ້ເລັ່ງລັດການປະຕິຮູບເພື່ອຮັບມືກັບສິ່ງທ້າທາຍຢ່າງຕັ້ງໜ້າ

ວັນທີ30ມິຖຸນາຜ່ານມາ, ກອງປະຊຸມຄະນະບໍລິຫານງານກອງປະຊຸມສຸດຍອດສະຫະພາບອາຟຣີກາຄັ້ງທີ29ໄດ້ຈັດຂຶ້ນຢູ່ສຳນັກງານໃຫຍ່ສະຫະພາບອາຟຣີກາທີ່ນະຄອນຫຼວງອາດິສອາເບບາຂອງເອທີໂອບີ. ທ່ານມູຊາ ຟາກີ, ປະທານຄະນະກຳມະການສະຫະພາບອາຟຣີກາກ່າວໃນພິທີເປີດວ່າ, ການປະຕິຮູບຂອງສະຫະພາບອາຟຣີກາເປັນຫົວຂໍ້ໃຈກາງທີ່ບັນດາປະເທດສະມາຊິກປຶກສາຫາລືກັນໃນກອງປະຊຸມສຸດຍອດ 2 ຄັ້ງຜ່ານມາ. ໃນກອງປະຊຸມສຸດຍອດຄັ້ງນີ້, ທ່ານຈະສືບຕໍ່ຮຽກຮ້ອງໃຫ້ບັນດາປະເທດຈົ່ງມີການກະທຳຕົວຈິງ, ເພື່ອເລັ່ງລັດການປະຕິຮູບ.

ນອກນີ້, ບັນຫາຊາວໜຸ່ມກໍ່ໄດ້ກາຍເປັນຈຸດສຸມໃນກອງປະຊຸມຄັ້ງນີ້. ທ່ານຟາກີກ່າວວ່າ, ຊັບພະຍາກອນອັນລ້ຳຄ່າທີ່ສຸດຂອງແຜ່ນດິນໃຫຍ່ອາຟຣີກາກໍແມ່ນຊາວໜຸ່ມ, ການຕອບສະໜອງຄວາມຕ້ອງການແລະຄວາມປາຖະໜາຂອງຊາວໜຸ່ມຈະຕັດສິນອະນາຄົດຂອງອາຟຣີກາ. ສະຫະພາບອາຟຣີກາໄດ້ຮັບຮູ້ວ່າຊາວໜຸ່ມມີບົດບາດອັນສຳຄັນໃນອະນາຄົດ,ສະນັ້ນຫົວຂໍ້ຂອງກອງປະຊຸມສຸດຍອດຄັ້ງນີ້ຈຶ່ງໄດ້ກຳນົດເປັນ "ລົງທຶນໃສ່ຊາວໜຸ່ມເພື່ອນຳໃຊ້ຜົນກຳໄລຈາກປະຊາກອນ".