ກອງປະຊຸມສຸດຍອດສະຫະພາບປາຊີຟິກຄັ້ງທີ 12 ໄດ້ຈັດຂຶ້ນຢູ່ເມືອງຄາລີທາງພາກຕາເວັນຕົກປະເທດໂກລົມບີແຕ່ວັນທີ 29 ຫາວັນທີ 30 ມິຖຸນາຜ່ານມາ. ໂດຍເນັ້ນຫົວຂໍ້ "ຖືສະຫະພາບປາຊີຟິກເປັນເວທີ, ຫຍັບເຂົ້າໃກ້ອາຊີປາຊີຟິກ". ໂກລົມບີໄດ້ເຂົ້າແທນຈີເລເປັນປະເທດປະທານໝູນວຽນສະຫະພາບປາຊີຟິກ. ຂະນະທີ່ໃນກອງປະຊຸມສຸດຍອດດັ່ງກ່າວໄດ້ຮັບຮອງເອົາ "ຖະແຫຼງການຄາລີ" ໃນວັນທີ 30 ມິຖຸນາຜ່ານມາ.
ອົສຕຼາລີ, ນູແວນເຊລັງ, ການາດາແລະສິງກະໂປໄດ້ຮັບຄຳເຊີນແລະເຂົ້າຮ່ວມກອງປະຊຸມສຸດຍອດດັ່ງກ່າວເປັນຄັ້ງທຳອິດ. ສະຫະພາບປາຊີຟິກຈະເຈລະຈາກັນກ່ຽວກັບການມອບຖານະ "ປະເທດຄູ່ຮ່ວມມື" ໃຫ້ແກ່ສີ່ປະເທດດັ່ງກ່າວ, ເຊິ່ງການເຈລະຈາຈະເລິ່ມຈັດຂຶ້ນຢູ່ນະຄອນຫຼວງລີມາປະເທດເປລູໃນເດືອນກັນຍາປີນີ້.
ປະເທດສະມາຊິກສະຫະພາບປາຊີຟິກໄດ້ກວມຍອດຈຳນວນ GDP ປະມານ 40% ຂອງເຂດອາເມລິກາລາຕິນ, ແລະຍອດມູນຄ່າການຄ້າກວມປະມານ 50% ຂອງເຂດອາເມລິກາລາຕິນ. ສີ່ປະເທດສະມາຊິກລ້ວນແຕ່ແມ່ນປະເທດທີ່ເສດຖະກິດເປີດປະຕູອ່າວກວ້າງຢູ່ອາເມລິກາລາຕິນ, ມີຈຸດຢືນຊຸກຍູ້ພັດທະນາເສດຖະກິດແບບເປີດປະຕູສູ່ພາຍນອກ, ແລະຕັ້ງໜ້າຊຸກຍູ້ການຄ້າເສລີແລະເປີດຕະຫຼາດ.