ໃນໂອກາດເຂົ້າຮ່ວມກອງປະຊຸມສຸດຍອດສະຫະພາບອາຟຼິກາຄັ້ງທີ 29 ແລະກອງປະຊຸມກ່ຽວຂ້ອງອື່ນໆທີ່ຈັດຂຶ້ນຢູ່ນະຄອນຫຼວງອາດິສອາເບບາປະເທດເອທິໂອປີໃນວັນທີ 2 ກໍລະກົດນີ້, ທ່ານນາງອາມະນີ ອັບຈະຢິດ ກຳມະການຜູ້ຮັບຜິດຊອບວຽກງານສິ່ງກໍ່ສ້າງພື້ນຖານໂຄງລ່າງແລະພະລັງງານຂອງສະຫະພາບອາຟຼິກາກ່າວວ່າ, ຈີນໄດ້ລົງທຶນຢູ່ອາຟຼິກາຢ່າງຫຼວງຫຼາຍໃນຂົງເຂດການກໍ່ສ້າງພື້ນຖານໂຄງລ່າງ, ແລະຈາກນີ້ອາຟຼິກາຫວັງຈະເພີ່ມທະວີການຮ່ວມມືໃນຂົງເຂດນີ້ກັບຈີນ.
ທ່ານນາງອາມະນີກ່າວວ່າ, ໃນໂອກາດເຂົ້າຮ່ວມກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ຈັດຂຶ້ນຢູ່ປັກກິ່ງໃນເດືອນພຶດສະພາປີນີ້, ເຊິ່ງໃນໄລຍະດັ່ງກ່າວ, ຕົນໄດ້ປຶກສາຫາລືກັບຫຼາຍພາກສ່ວນຂອງຈີນຢ່າງເລິກເຊິ່ງກ່ຽວກັບການຮ່ວມມືລະຫວ່າງອາຟຼິກາກັບຈີນ. ເຊິ່ງອາຟຼິກາກໍພວມສຸມທຸກຄວາມພະຍາຍາມເພື່ອບັນລຸ "ເປົ້າໝາຍປີ 2063", ດ້ວຍການປັບປຸງພື້ນຖານໂຄງລ່າງໃຫ້ດີຂຶ້ນ, ລວມທັງການຊຸກຍູ້ການເຊື່ອມໂຍງເຂົ້າກັນຂອງອາຟຼິກາແມ່ນເນື້ອໃນສຳຄັນເພື່ອບັນລຸວິໄສທັດດັ່ງກ່າວ. ພາຍໃຕ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນ, ຈີນແລະອາຟຼິກາຈະກາຍເປັນຄູ່ຮ່ວມມືໃນຂົງເຂດການກໍ່ສ້າງພື້ນຖານໂຄງລ່າງທີ່ແຂງແຮງ.
 |
