ວັນທີ 3 ກໍລະກົດນີ້, ທ່ານແອມມານູແອນ ມາກຣົງ ປະທານາທິບໍດີຝຣັ່ງໄດ້ເປັນປະທານ ກອງປະຊຸມຮ່ວມສະພາສູງແລະສະພາຕ່ຳທີ່ຈັດຂຶ້ນຢູ່ວັງເວີເຊວ ຊານເມືອງຕາເວັນຕົກສຽງໃຕ້ນະຄອນຫຼວງປາຣີປະເທດດັ່ງກ່າວແລະໄດ້ປະກາດທິດທາງແລະຈຸດຢືນການບໍລິຫານປະເທດໃນ 5 ປີຕໍ່ໜ້າ.
ທ່ານມາກຣົງກ່າວວ່າ ໃນເດືອນພະຈິກປີນີ້ຈະຍົກເລີກການປະກາດພາວະສຸກເສີນທົ່ວປະເທດຫຼັງປະຕິບັດມາແຕ່ເດືອນພະຈິກ 2015 ທັງວາງມາດຕະການໃໝ່ຕ້ານການກໍ່ການຮ້າຍໂດຍອີງຕາມກົດໝາຍວ່າດ້ວຍການຕ້ານການກໍ່ການຮ້າຍສະບັບໃໝ່ທີ່ສະເໜີໂດຍຄະນະລັດຖະບານເມື່ອວັນທີ 22 ມິຖຸນາຜ່ານມາ ແລະສ້າງຕັ້ງກົນໄກຕ້ານການກໍ່ການຮ້າຍໄລຍະຍາວໃຫ້ມີປະສິດທິຜົນ ຫຼັງຍົກເລີກການປະກາດພາວະສຸກເສີນທົ່ວປະເທດ.
ນອກນີ້, ທ່ານມາກຣົງຍັງມີແຜນຈະເສີມຄວາມແຂງແກ່ນຂອງສະຫະພາບເອີຣົບໃນໄລຍະອາຍຸການດຳລົງຕຳແໜ່ງຂອງຕົນເພື່ອຫຼຸດຜ່ອນລະບຽບແບບແຜນເຮັດວຽກແບບອາດຍາສິດ ແລະສ້າງເອີຣົບໃຫ້ເຂັ້ມແຂງຍິ່ງຂຶ້ນ. ທ່ານມາກຣົງຍັງໃຫ້ສັນຍາວ່າ ຈະຈັດກອງປະຊຸມຮ່ວມສະພາສູງແລະສະພາຕ່ຳທຸກປີໃນໄລຍະຄອງອຳນາດເພື່ອລາຍງານສະພາບການປະຕິບັດໜ້າທີ່ວຽກງານ ແລະຮັບຟັງຄວາມຄິດຄວາມເຫັນຂອງບັນດາສະມາຊິກສະພາ.
 |
