ທ່ານຢູຣິ ອຸຊາກົບ ຜູ້ຊ່ວຍປະທານາທິບໍດີຣັດເຊຍເປີດເຜີຍໃນວັນທີ 4 ກໍລະກົດນີ້ວ່າ, ທ່ານວຼາດິເມຍ ປູຕິນ ປະທານາທິບໍດີປະເທດຕົນແລະທ່ານໂດນັນ ທຣຳ ປະທານາທິບໍດີອາເມລິກາຈະພົບປະກັນເປັນຄັ້ງທຳອິດໃນວັນທີ 7 ກໍລະກົດນີ້.
ທ່ານອຸຊາກົບກ່າວວ່າ, ການພົບປະລະຫວ່າງປະມຸກລັດສອງປະເທດໄດ້ຕົກລົງແລ້ວຫຼັງໄດ້ມີການປຶກສາຫາລືກັນໂດຍທັງສອງທ່ານຈະພົບປະກັນໃນວັນທີ 7 ກໍລະກົດນີ້ເຊິ່ງເປັນໄລຍະຈັດກອງປະຊຸມສຸດຍອດ G20 ຢູ່ເມືອງແຮມເບີກປະເທດເຢຍລະມັນ, ແລະຖືວ່ານີ້ແມ່ນການພົບປະກັນຄັ້ງທຳອິດລະຫວ່າງປະມຸກລັດສອງປະເທດ.
ສື່ມວນຊົນຣັດເຊຍລາຍງານວ່າ, ການພົບປະກັນຈະເນັ້ນບັນຫາຊີຣີ, ບັນຫາອູແກຣນ, ການຕໍ່ຕ້ານລັດທິກໍ່ການຮ້າຍສາກົນແລະອື່ນໆ.
ນັບແຕ່ທ່ານໂດນັນ ທຣຳດຳລົງຕຳແໜ່ງປະທານາທິບໍດີອາເມລິກາໃນວັນທີ 20 ມັງກອນປີນີ້ເປັນຕົ້ນມາ, ຈົນຮອດປັດຈຸບັນ, ທ່ານປູຕິນແລະທ່ານທຣຳໄດ້ລົມກັນທາງໂທລະສັບ 3 ເທື່ອ, ແຕ່ບໍ່ໄດ້ພົບປະກັນແບບສອງຕໍ່ສອງເທື່ອ.