ໄລຍະແຕ່ວັນທີ 8 ຫາວັນທີ 11 ກໍລະກົດນີ້ແມ່ນວັນອາສາຫະບູຊາ ແລະ ວັນເຂົ້າພັນສາຂອງໄທ ເຊິ່ງແມ່ນໜຶ່ງໃນວັນບຸນຕ່າງໆທີ່ສຳຄັນທີ່ສຸດໃນສາສະໜາພຸດ ແລະໂອກາດນີ້ ທົ່ວປະເທດໄທກໍໄດ້ຈັດກິດຈະກຳຕ່າງໆ ເພື່ອສະຫຼອງວັນບຸນດັ່ງກ່າວ.
ອົງການທ່ອງທ່ຽວແຫ່ງຊາດໄທ ແລະ ແຂວງສຸຣິນ ໄດ້ຈັດກິດຈະກຳສູດມົນຢູ່ຫຼັງຊ້າງ ແລະ ແຫ່ທຽນໃນວັນທີ 8 ກໍລະກົດນີ້ ໂດຍໃນກິດຈະກຳດັ່ງກ່າວ, ພະສົງຈາກວັດທີ່ມີຊື່ສຽງແຫ່ງຕ່າງໆໃນແຂວງສຸຣິນ ໄດ້ເຂົ້າຮ່ວມການແຫ່ທຽນ ແລະ ໃນວັນດັ່ງກ່າວ, ວັດທຳມະກາຍທີ່ມີຊື່ສຽງໂດ່ງດັງທີ່ຢູ່ໃກ້ນະຄອນຫຼວງບາງກອກ ກໍໄດ້ສະແດງທຳມະເທດສະໜາວັນອາສາຫະບູຊາ, ຂະນະທີ່ພຸດທະສາສະນິກະຊົນກໍໄປໃສ່ບາດ ແລະ ສູດມົນຂໍພອນ.