ວັນທີ 9 ກໍລະກົດນີ້, ກະຊວງການຕ່າງປະເທດປາກິສະຖານໄດ້ເຊີນຮອງຜູ້ແທນລະດັບສູງອິນເດຍປະຈຳປະເທດຕົນເຂົ້າພົບ ເພື່ອປະທ້ວງຕໍ່ອິນເດຍຫຼັງເກີດເຫດການຍິງປະທະກັນລະຫວ່າງທະຫານສອງປະເທດໃນມື້ຜ່ານມາ ແລະຮຽກຮ້ອງໃຫ້ອິນເດຍປະຕິບັດຕາມສັນຍາຢຸດຍິງທີ່ສອງຝ່າຍລົງນາມເມື່ອປີ 2003.
ຖະແຫຼງການທີ່ກະຊວງການຕ່າງປະເທດປາກິສະຖານເປີດເຜີຍໃນມື້ດຽວກັນລະບຸວ່າ, ທະຫານອິນເດຍທີ່ຢູ່ໃກ້ເຂດຄວບຄຸມກັສເມຍໄດ້ຍິງປືນເຂົ້າເບື້ອງປາກິສະຖານ "ໂດຍບໍ່ມີເຫດຜົນ" ສົ່ງຜົນເຮັດໃຫ້ປະຊາຊົນປາກິສະຖານເສຍຊີວິດ 2 ຄົນແລະບາດເຈັບ 3 ຄົນ. ຈາກນີ້ ປາກິສະຖານຈິ່ງຮຽກຮ້ອງໃຫ້ອິນເດຍສືບສວນເຫດການດັ່ງກ່າວ ແລະເຫດການອື່ນໆທີ່ລະເມີດສັນຍາຢຸດຍິງ, ຂະນະດຽວກັນ ກໍຮຽກຮ້ອງໃຫ້ໜ່ວຍສັງເກດການທາງການທະຫານສະຫະປະຊາຊາດປະຈຳອິນເດຍແລະປາກິສະຖານຈົ່ງດຳເນີນການໄກ່ເກ່ຍໃຫ້ລຸລ່ວງໂດຍດີ.
ກ່ອນໜ້ານີ້ມື້ໜຶ່ງ, ເຈົ້າໜ້າທີ່ກົມຖະແຫຼງຂ່າວ 3 ເຫຼົ່າທັບຂອງປາກິສະຖານໄດ້ອອກຖະແຫຼງການວ່າ, ທະຫານອິນເດຍໄດ້ຍິງປືນໃສ່ເບື້ອງປາກິສະຖານຢູ່ໃກ້ເສັ້ນຄວບຄຸມກັສເມຍ "ໂດຍບໍ່ມີເຫດຜົນ" ເຊິ່ງສົ່ງຜົນເຮັດໃຫ້ປະຊາຊົນປາກິສະຖານເສຍຊີວິດ 2 ຄົນ ແລະບາດເຈັບ 3 ຄົນ ແລະໃນມື້ດຽວກັນ ກະຊວງການຕ່າງປະເທດປາກິສະຖານກໍໄດ້ເຊີນຮອງຜູ້ແທນລະດັບສູງອິນເດຍປະຈຳປາກິສະຖານເຂົ້າພົບ ເພື່ອປະທ້ວງໃນເລື່ອງນີ້.