ເຈົ້າໜ້າທີ່ລັດຖະບານໄທກ່າວໃນວັນທີ 11 ກໍລະກົດນີ້ວ່າ, ລັດຖະບານປະເທດຕົນໄດ້ອະນຸມັດໂຄງການຮ່ວມມືທາງລົດໄຟໄທ-ຈີນຕອນບາງກອກ-ນະຄອນຣາຊະສີມາແລ້ວໂດຍຄາດວ່າຈະເລີ່ມລົງມືກໍ່ສ້າງໃນເດືອນກັນຍາປີນີ້ ແລະໃຊ້ເວລາກໍ່ສ້າງ 4 ປີ.
ທ່ານ ກອບສັກ ພູຕະກຸນ ຮອງລັດຖະມົນຕີປະຈຳສຳນັກງານນາຍົກລັດຖະມົນຕີໄທ ກ່າວຕໍ່ສື່ມວນຊົນຫຼັງກອງປະຊຸມລັດຖະບານວ່າ, ລັດຖະບານໄດ້ອະນຸມັດໃຫ້ກົມທາງລົດໄຟໄທຊຸກຍູ້ການກໍ່ສ້າງແຕ່ນະຄອນຫຼວງບາງກອກຫານະຄອນຣາຊະສີມາທີ່ມີຄວາມຍາວ 253 ກິໂລແມັດ, ແລ່ນດ້ວຍຄວາມໄວສູງສຸດ 250 ກິໂລແມັດຕໍ່ຊົ່ວໂມງ ແລະຄາດວ່າຈະລົງທຶນ 179 ຕື້ 400 ລ້ານບາດ ເຊິ່ງລັດຖະບານຈະຮັບຜິດຊອບໂດຍກົງ 100%. ຂະນະດຽວກັນ, ທ່ານ ປຣະຍຸດ ຈັນໂອຊາ ນາຍົກລັດຖະມົນຕີໄທກໍກ່າວວວ່າ, ຕອນບາງກອກ-ນະຄອນຣາຊະສີມາ ເປັນໂຄງການໄລຍະທີໜຶ່ງຂອງໂຄງການຮ່ວມມືທາງລົດໄຟໄທ-ຈີນ ແລະຫຼັງຈາກນີ້, ລັດຖະບານຈະສືບຕໍ່ຊຸກຍູ້ການກໍ່ສ້າງໄລຍະທີສອງ.
ຕາມຂັ້ນຕອນແລ້ວ, ໂຄງການດັ່ງກ່າວຍັງຕ້ອງຜ່ານການລົງຄະແນນສຽງຈາກສະພານິຕິບັນຍັດໄທ ເຊິ່ງຖ້າຜ່ານແລ້ວ, ຈີນແລະໄທຈະລົງນາມໃນສັນຍາຕ່າງໆ ແລະເປີດປະມູນລົງມືກໍ່ສ້າງເປັນຕອນໆ.
 |
