ທ່ານເຊັດເອືອງ ຮອງຜູ້ວ່າການທະນາຄານກາງມຽນມາຢືນຢັນໃນກອງປະຊຸມສະພາປະຊາຊົນ ທີ່ຈັດຂຶ້ນໃນວັນທີ 10 ກໍລະກົດນີ້ວ່າ: ບົນພື້ນຖານການພັດທະນາຂະແໜງການທະນາຄານຢູ່ປະເທດຕົນ ແລະ ຂໍ້ສະເໜີຈາກອົງການກອງທຶນເງິນຕາສາກົນ ຫຼື IMF, ມຽນມາຈະບໍ່ຫຼຸດຜ່ອນຂີດຈຳກັດຕໍ່ທະນາຄານຕ່າງປະເທດໃນໄລຍະສັ້ນ, ແຕ່ຈະເປີດກວ້າງຂອບເຂດທຸລະກິດຂອງທະນາຄານຕ່າງປະເທດເປັນກ້າວໆ.
ທ່ານເຊັດເອືອງ ກ່າວຕື່ມວ່າ: ທະນາຄານກາງປະເທດຕົນ ໄດ້ຫຼຸດຜ່ອນຂີດຈຳກັດຕໍ່ທະນາຄານຕ່າງປະເທດມາ 2 ເທື່ອແລ້ວ ເຊິ່ງເທື່ອທຳອິດ ຄື ອະນຸຍາດໃຫ້ທະນາຄານຕ່າງປະເທດສ້າງຕັ້ງສາຂາຢູ່ເຂດເສດຖະກິດພິເສດ ແລະ ເທື່ອທີ 2 ອະນຸຍາດໃຫ້ທະນາຄານຕ່າງປະເທດຮ່ວມມືກັບທະນາຄານປະເທດຕົນບໍລິການວິສາຫະກິດປະເທດຕົນ. ແນວໃດກໍດີ ຄາດວ່າຈະອະນຸຍາດອີກເປັນເທື່ອທີ 3 ຄື ໃຫ້ທະນາຄານຕ່າງປະເທດບໍລິການວິສາຫະກິດປະເທດຕົນໂດຍກົງໃນມໍ່ໆນີ້. ຂະນະທີ່ໃນຂັ້ນຕອນຕໍ່ໄປ ກໍຈະວາງແຜນໂດຍອະນຸຍາດໃຫ້ທະນາຄານຕ່າງປະເທດຂາຍຍ່ອຍທຸລະກິດການທະນາຄານ, ແຕ່ກໍຕ້ອງໄດ້ພິຈາລະນາເຖິງຄວາມໝັ້ນຄົງຂອງທະນາຄານ ແລະ ຄວາມສາມາດຄຸ້ມຄອງຂອງທະນາຄານກາງປະເທດຕົນເປັນບຸລິມະສິດ.
