ນັກເສດຖະສາດ 15 ທ່ານ ອະດີດທີ່ປຶກສາດ້ານເສດຖະກິດຂອງທຳນຽບຂາວອາເມລິກາ ໄດ້ຮ່ວມກັນລົງນາມໃນຈົດໝາຍສົ່ງເຖິງທ່ານໂດນັນ ທຣຳ ປະທານາທິບໍດີປະເທດຕົນໃນວັນທີ 12 ກໍລະກົດນີ້ ໂດຍເນື້ອໃນຈົດໝາຍເນັ້ນການເຕືອນທ່ານບໍ່ຄວນຖືເອົາຄວາມໝັ້ນຄົງແຫ່ງຊາດເປັນຂໍ້ອ້າງ ແລະຂຶ້ນພາສີນຳເຂົ້າຜະລິດຕະພັນເຫຼັກກ້າຕື່ມ.
ບັນດານັກເສດຖະສາດຊີ້ວ່າ: ປະເທດຕົນໄດ້ເກັບພາສີຕ້ານການຂາຍເທຕະຫຼາດ ແລະ ຕ້ານການອຸດໜູນລາຄາເຖິງ 150 ກວ່າລາຍການຕໍ່ການນຳເຂົ້າເຫຼັກກ້າ ເຊິ່ງບາງອັດຕາພາສີສູງເຖິງ 266%. ແນວໃດກໍດີ, ການຍົກອັດຕາພາສີຈະເປັນການທຳລາຍສາຍພົວພັນລະຫວ່າງອາເມລິກາກັບພັນທະມິດຂອງຕົນ. ນອກນີ້, ການເກັບພາສີນຳເຂົ້າເຫຼັກກ້າຕື່ມກໍຈະເຮັດໃຫ້ຕົ້ນທຶນຂອງບໍລິສັດໃນຂະແໜງການຜະລິດຂອງປະເທດຕົນເພີ່ມຂຶ້ນ ເຮັດໃຫ້ການປະກອບອາຊີບໃນຂະແໜງການຜະລິດຫຼຸດລົງ ແລະ ລາຄາແພງຂຶ້ນ ເຊິ່ງທີ່ສຸດແລ້ວກໍຈະສົ່ງຜົນທາງລົບຕໍ່ເສດຖະກິດປະເທດຕົນ. ດ້ວຍເຫດນີ້, ທ່ານໂດນັນ ທຣຳ ບໍ່ຄວນນຳໃຊ້ນະໂຍບາຍທີ່ຖືເອົາຕົ້ນທຶນເສດຖະກິດແລະການຕ່າງປະເທດເປັນຫຼັກເພື່ອຄວາມໝັ້ນຄົງແຫ່ງຊາດ ເຊິ່ງມັນເກີດຄວາມເສຍຫາຍຫຼາຍກວ່າຜົນໄດ້ຮັບ.