ຟິລິບປິນພິຈາລະນາຫ້າມນຳເຂົ້າຜະລິດຕະພັນຊີ້ນຈາກເບຣຊິນ

ສຳນັກຂ່າວ ABS-CBN ຂອງຟິລິບປິນລາຍງານໃນວັນທີ 11 ກໍລະກົດນີ້ວ່າ, ຫວ່າງມໍ່ໆນີ້, ກະຊວງກະສິກຳປະເທດຕົນ ໄດ້ກວດພົບເຊື້ອພະຍາດ Salmonella typhimurium ຈາກຊີ້ນງົວເກືອບ 500 ກິໂລທີ່ນຳເຂົ້າຈາກເບຣຊິນ ທັງໄດ້ຍຶດຊີ້ນດັ່ງກ່າວນີ້. ປັດຈຸບັນ, ກະຊວງດັ່ງກ່າວພວມພິຈາລະນາຈະໃຊ້ມາດຕະການເພື່ອ ຫ້າມນຳເຂົ້າຜະລິດຕະພັນຊີ້ນຈາກເບຣຊິນ 100% ຫຼືສ່ວນໃດໜຶ່ງ.

ທັງນີ້ ໃນປີ 2016 ຜ່ານມາ, ຟິລິບປິນໄດ້ນຳເຂົ້າຜະລິດຕະພັນຊີ້ນຈາກເບຣຊິນ 5 ໝື່ນ 5 ພັນ 600 ໂຕນ ກວມປະມານ 6% ຂອງຍອດການນຳເຂົ້າລວມໃນປີ, ໃນນັ້ນ, ຊີ້ນງົວ 1 ໝື່ນ 8 ພັນ 500 ໂຕນ, ຊີ້ນໄກ່ທີ່ບໍ່ຕິດກະດູກ 3 ໝື່ນ 600 ໂຕນ; ສ່ວນໃນ 5 ເດືອນທຳອິດຂອງປີນີ້, ໄດ້ນຳເຂົ້າຜະລິດຕະພັນຊີ້ນ 2 ໝື່ນ 700 ໂຕນ, ໃນນັ້ນ, ຊີ້ນງົວ 6600 ໂຕນ ແລະຊີ້ນໄກ່ 13000 ໂຕນ.