ໜັງສືພິມ ວຽງຈັນທາມສ໌ ຂອງລາວສະບັບວັນທີ 13 ກໍລະກົດນີ້ລາຍງານວ່າ: ຫວ່າງມໍ່ໆມານີ້, ຄະນະອຳນວຍການບໍລິຫານງານທະນາຄານໂລກຢູ່ນະຄອນຫຼວງວໍຊິງຕັນ ໄດ້ອະນຸມັດທຶນສະໜັບສະໜູນ 30 ລ້ານໂດລາສະຫະລັດໃຫ້ແກ່ໂຄງການຄຸ້ມຄອງຄວາມສ່ຽງໄພທຳມະຊາດອາຊີຕາເວັນອອກສຽງໃຕ້ (DRM) ພາກສ່ວນລາວ ແລະ ເພີ່ມທຶນອີກ 25 ລ້ານໂດລາສະຫະລັດໃຫ້ໂຄງການລວມຄຸ້ມຄອງຊັບພະຍາກອນນ້ຳແມ່ນ້ຳຂອງ ຫຼື MIWRM.
ຂ່າວລາຍງານຕື່ມວ່າ: ໂຄງການ DRM ຈະສ້າງຜົນປະໂຫຍດໃຫ້ແກ່ປະຊາຊົນລາວ ໂດຍຜ່ານຈາກຂ່າວເຕືອນໄພ, ກົນໄກລະດົມທຶນເພື່ອຟື້ນຕົວຈາກໄພ ແລະມາດຕະການອື່ນໆ; ຂະນະທີ່ໂຄງການ MIWRM ຈະເຮັດໃຫ້ປະຊາຊົນໄດ້ຮັບປະໂຫຍດ ຜ່ານການສ້າງຫ້ອງກວດກາຄຸນນະພາບນ້ຳແຫ່ງຊາດ ແລະ ປະເມີນສະພາບການນຳໃຊ້ຊັບພະຍາກອນນ້ຳພາຍໃຕ້ສະພາບດິນຟ້າອາກາດຕ່າງໆ. ສອງໂຄງການດັ່ງກ່າວຈະປະສານສົມທົບກັນ ເພື່ອຮັບປະກັນໃຫ້ປະຊາຊົນລາວຫຼີກເວັ້ນຜົນກະທົບຈາກໄພທຳມະຊາດ ພ້ອມທັງອະນຸລັກຊັບພະຍາກອນການປະມົງ, ດິນທາມ ແລະ ຊັບພະຍາກອນນ້ຳທີ່ອຸດົມສົມບູນ.
