ລົດແຂ່ງ 400 ກວ່າຄັນແລະນັກກິລາກວ່າ 1000 ຄົນ ທີ່ໄດ້ເຂົ້າຮ່ວມການແຂ່ງລົດແຣນລີສາກົນເສັ້ນທາງສາຍໄໝ 2017 ນັ້ນໄດ້ຜ່ານດ່ານບາເຄິທູເຂດປົກຄອງຕົນເອງອຸຍເກີຊິນຈ່ຽງເຂົ້າປະເທດຈີນແລ້ວໃນວັນທີ 14 ກໍລະກົດນີ້ເພື່ອຈະເປີດການແຂ່ງຂັນຢູ່ຈີນ.
ການແຂ່ງລົດແຣນລີເທື່ອນີ້ເລີ່ມອອກເດີນທາງຈາກສະໜາມແດງນະຄອນຫຼວງມົສກູປະເທດຣັດເຊຍໃນວັນທີ 7 ກໍລະກົດນີ້ໂດຍຜ່ານກາຊັກສະຖານ, ໃນທີ່ສຸດຈະໄປເຖິງຈຸດໝາຍປາຍທາງຢູ່ເມືອງຊີ່ອ່ານ ແຂວງສ້ານຊີ່ ສປ ຈີນໃນວັນທີ 22 ເດືອນນີ້ແລະຈະດຳເນີນເປັນເວລາ 16 ວັນ, ໄລຍະທາງການແຂ່ງລົດຍາວທັງໝົດ 9589 ກິໂລແມັດ ເຊິ່ງລວມເຖິງໄລຍະທາງແຂ່ງລົດພິເສດ 4094 ກິໂລແມັດ, ໃນນີ້, ໄລຍະທາງການແຂ່ງຂັນຢູ່ຈີນຈະກວມກວ່າເຄິ່ງໜຶ່ງໂດຍຈະຜ່ານເຂດປົກຄອງຕົນເອງອຸຍເກີຊິນຈ່ຽງ, ແຂວງກ່ານຊູ້, ເຂດປົກຄົງຕົນເອງມົງໂກໃນ, ເຂດປົກຄອງຕົນເອງເຜົ່າຮຸຍນິງເຊ້ຍແລະແຂວງສ້ານຊີ່.
ການແຂ່ງລົດແຣນລີຄັ້ງນີ້ໄດ້ຈັດຂຶ້ນໂດຍກະຊວງກິລາຣັດເຊຍແລະກົມກິລາແຫ່ງຊາດຈີນເປັນເຈົ້າພາບຮ່ວມ ເຊິ່ງເປັນໜຶ່ງໃນບັນດາກິດຈະກຳການຮ່ວມມືດ້ານກິລາແລະການແລກປ່ຽນວັດທະນະທຳລະຫວ່າງສອງປະເທດ ແລະການແຂ່ງລົດເທື່ອນີ້ໄດ້ຜ່ານຣັດເຊຍ,ກາຊັກສະຖານແລະຈີນ ເຊິ່ງຈະປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍສາຍພົວພັນມິດຕະພາບແລະການແລກປ່ຽນວັດທະນະທຳລະຫວ່າງບັນດາປະເທດລຽບຕາມເສັ້ນທາງສາຍໄໝ.
 |
