ຫຼັງໄດ້ຮັບເລືອກຕັ້ງເປັນປະທານສະມາຄົມຄວາມເຂົ້າໃຈຟີລິບປິນ-ຈີນ, ທ່ານນາງກລໍເຣຍ ມາກາປາກັນ ອາໂລໂຢ ອະດີດປະທານາທິບໍດີຟີລິບປິນກໍໄດ້ກ່າວປາໄສໃນວັນທີ 16 ກໍລະກົດນີ້ໂດຍເນັ້ນວ່າ ຕ້ອງສົ່ງເສີມສາຍພົວພັນລະຫວ່າງຟີລິບປິນ-ຈີນຢ່າງກົມກຽວແລະດ້ວຍ "ສະພາບແວດລ້ອມທາງການເມືອງປະເທດພວກເຮົາຕ້ອງການສົ່ງເສີມສາຍພົວພັນທີ່ໝັ້ນທ່ຽງແລະປອດໃສແທ້ຈິງ ເພື່ອສົ່ງເສີມສັນຕິພາບ,ຄວາມປອງດອງແລະຄວາມຈະເລີນຮຸ່ງເຮືອງລະຫວ່າງປະຊາຊົນແລະນີ້ຄືວິໄສທັດຂອງສະມາຄົມ".
ໜັງສືພິມ Daily Inquirer ຟີລິບປິນລາຍງານວ່າ: ທ່ານນາງອາໂລໂຢເຫັນວ່າ ການທີ່ສະມາຄົມຄວາມເຂົ້າໃຈຟີລິບປິນ-ຈີນຟື້ນຟູໜ້າທີ່ວຽກງານນັ້ນກໍຖືວ່າທັນການທັນເວລາ ເຊິ່ງສາມາດເພີ່ມທະວີຄວາມກົມກຽວແລະສັນຕິພາບລະຫວ່າງຟີລິບປິນກັບຈີນ ແລະໃນອີກບໍ່ດົນຕໍ່ໜ້າ, ສະມາຄົມ ຈະປະຕິບັດແຜນການແລກປ່ຽນລະຫວ່າງຟີລິບປິນ-ຈີນເຊິ່ງກວມເອົາການສຳມະນາ,ວັດທະນະທຳແລະການດຳເນີນທຸລະກິດແລະອື່ນໆ ທັງນຳໃຊ້ຊື່ສຽງອິດທິພົນຂອງຕົນເພື່ອສົ່ງເສີມການຮ່ວມມືແລະຄວາມສາມັກຄີລະຫວ່າງສອງປະເທດ.
ສະມາຄົມຄວາມເຂົ້າໃຈຟີລິບປິນ-ຈີນເປັນອົງການຈັດຕັ້ງສຳລັບການໄປມາຫາສູ່ກັນລະຫວ່າງປະຊາຊົນຟີລິບປິນ-ຈີນທີ່ສ້າງຕັ້ງຂຶ້ນເມື່ອຕົ້ນຊຸມປີ 1970 ເຊິ່ງທ່ານນາງອາໂລໂຢເປັນຜູ້ມີສ່ວນຮ່ວມສ້າງຕັ້ງ ແລະສະມາຄົມດັ່ງກ່າວກໍໄດ້ເສີມຂະຫຍາຍບົດບາດສຳຄັນໃນການສ້າງຕັ້ງສາຍພົວພັນທາງການທູດລະຫວ່າງສອງປະເທດ.
 |
