ສປ ຈີນໄດ້ເປີດຊຸດອົບຮົມເພື່ອຍົກຂີດຄວາມສາມາດໃຫ້ຄູສອນພາສາຈີນ ແລະ ພະນັກງານຫຼັກແຫຼ່ງຂອງສະມາຄົມຊາວຈີນໃນອາຊຽນຂຶ້ນຢູ່ເມືອງໜານໜິງ ເທດສະບານເຂດກວາງຊີ ໃນວັນທີ 17 ກໍລະກົດນີ້ ໂດຍສຳມະນາກອນ 30 ກວ່າຄົນຈາກລາວ, ໄທ ແລະ ຫວຽດນາມ ຈະໄດ້ຮັບການອົບຮົມຢ່າງເປັນລະບົບເປັນເວລາ 15 ວັນ.
ທ່ານນາງ ເສີນເຈ ຮອງຫົວໜ້າຫ້ອງການກິດຈະການຊາວຈີນແລະຈີນຕ່າງດ້າວເຂດກວາງຊີ ກ່າວເປີດຊຸດອົບຮົມວ່າ: ຄຽງຄູ່ກັບຄວາມຄືບໜ້າໃນການສ້າງ "ໜຶ່ງແລວທາງໜຶ່ງເສັ້ນທາງ" ເລື້ອຍໆ, ການຮຽນວັດທະນະທຳຈີນກໍນັບມື້ນັບໄດ້ຮັບຄວາມສົນໃຈຈາກປະຊາຄົມໂລກ ຈຶ່ງມີຄວາມຈຳເປັນຮີບດ່ວນໃນການສ້າງຄູສອນພາສາຈີນໃຫ້ເພີ່ມຂຶ້ນ ແລະ ມີຄຸນນະພາບສູງຂຶ້ນ. ຂະນະທີ່ເປົ້າໝາຍການຍົກລະດັບເທື່ອນີ້ໄດ້ກວມເອົາຫົວໜ້າສະມາຄົມຊາວຈີນຢູ່ຕ່າງປະເທດເປັນຄັ້ງທຳອິດ ຫວັງໃຫ້ສະມາຄົມສ້າງຄູສອນພາສາຈີນໃຫ້ໄດ້ຫຼາຍກວ່າເກົ່າແລະມີຄຸນນະພາບຍິ່ງຂຶ້ນ ທັງເປັນການຊຸກຍູ້ການເຜີຍແຜ່ວັດທະນະທຳຈີນຕື່ມອີກ.
ຂ່າວລາຍງານຕື່ມວ່າ: ເພື່ອຍົກລະດັບຄວາມຮູ້ຂອງສຳມະນາກອນ ແລະ ສຳຜັດກັບວັດທະນະທຳກໍຄືຮີດຄອງປະເພນີ ທີ່ມີເອກະລັກສະເພາະຂອງຊົນເຜົ່າຈ້ວງ, ເຈົ້າພາບໄດ້ເປີດຫຼັກສູດການສອນກັງຟູ, ອາລະຍະທຳພິທີການຊົນຊາດຈີນ, ການຟ້ອນ, ການແຕ້ມ, ການຂຽນງາມ ແລະອື່ນໆ ທັງຈະໄປທັດສະນະສຶກສາຫໍພິພິທະພັນຊົນເຜົ່າກວາງຊີຕື່ມອີກ.