ເຈົ້າໜ້າທີ່ທີ່ກ່ຽວຂ້ອງເປີຍເຜີຍໃນພິທີຖະແຫຼງຂ່າວ ການກະກຽມກອງປະຊຸມເວທີປຶກສາຫາລືການຮ່ວມມືຂະແໜງການບໍ່ແຮ່ຈີນ-ອາຊຽນປີ 2017 ວ່າ, ກອງປະຊຸມດັ່ງກ່າວຈະຈັດຂຶ້ນຢູ່ສູນວາງສະແດງສາກົນໜານໜິງແຕ່ວັນທີ 23 ຫາ 26 ສິງຫານີ້ ແລະປີນີ້ເນັ້ນຫົວຂໍ້ "ສ້າງສູນຂໍ້ມູນຂ່າວສານຂະແໜງການບໍ່ແຮ່ຈີນ-ອາຊຽນ ແລະລົງເລິກເວທີການຮ່ວມມືໃໝ່ກ່ຽວກັບ ໜຶ່ງແລວທາງໜຶ່ງເສັ້ນທາງ".
ຂ່າວແຈ້ງຕື່ມວ່າ, ຄາດວ່າຈະມີ 800 ທ່ານເຂົ້າຮ່ວມກອງປະຊຸມ ໂດຍຈະປະກອບມີເຈົ້າໜ້າທີ່ຄຸ້ມຄອງຂະແໜງການບໍ່ແຮ່, ຕົວແທນວິສາຫະກິດ, ຜູ້ຮັບຜິດຊອບສະມາຄົມຕ່າງໆ ແລະແຂກຮັບເຊີນຈາກບັນດາປະເທດໃນອາຊຽນປະມານ 100 ທ່ານ, ທີ່ສຳຄັນໃນກອງປະຊຸມຄັ້ງນີ້ຈະລົງນາມໃນສັນຍາໂຄງການ 10 ສະບັບ, ໂຄສະນາ 10 ໂຄງການ, ໂຄສະນາໂຄງການໃນອາຊຽນແລະປະເທດອື່ນໆ 50 ໂຄງການຂຶ້ນໄປ ແລະສະຫະພັນຂະແໜງການບໍ່ແຮ່ຈີນຈະລົງນາມໃນສັນຍາຮ່ວມມືກັບສະຫະພັນຂະແໜງການບໍ່ແຮ່ອາຊຽນຕື່ມອີກ.