ເຈົ້າໜ້າທີ່ຫ້ອງການທາງລົດໄຟຄຸນມິງ ສປ ຈີນແຈ້ງວ່າ: ອຸມົງຊົງຊ່ຽງໝາຍເລກ 3 ເຊິ່ງເປັນອຸມົງແຫ່ງທຳອິດຂອງທາງລົດໄຟຢູ້ຊີ່-ບໍ່ຫານ ທາງຜ່ານສາກົນຈີນ-ລາວທີ່ຮັບເໝົາກໍ່ສ້າງໂດຍພະແນກໂຄງການທາງລົດໄຟຢູ້ຊີ່-ບໍ່ຫານ ກຸ່ມບໍລິສັດທາງລົດໄຟຈີນໝາຍເລກ 18 ນັ້ນໄດ້ສຳເລັດການເຈາະທະລຸແລ້ວເຊິ່ງເປັນຂີດໝາຍສະແດງໃຫ້ເຫັນວ່າ ການກໍ່ສ້າງທາງລົດໄຟຈີນ-ລາວຍ່ານໃນປະເທດຈີນໄດ້ຮັບຄວາມຄືບໜ້າຢ່າງຍິ່ງໃຫຍ່.
ອຸມົງຊົງຊ່ຽງໝາຍເລກ 3 ທີ່ຍາວ 220 ແມັດໄດ້ລົງມືກໍ່ສ້າງຢ່າງເປັນທາງການໃນວັນທີ 5 ເມສາຜ່ານມາ ແລະເຖິງວ່າປະສົບຄວາມຫຍຸ້ງຍາກໃນການກໍ່ສ້າງຫຼາຍສົມຄວນ,ແຕ່ຄວາມບຸກບືນສູ້ຊົນຂອງນັກວິຊາການແລະກຳມະກອນມາເປັນເວລາ 100 ກວ່າວັນ ໃນທີ່ສຸດກໍເຈາະທະລຸຕາມແຜນການ.
ທາງລົດໄຟສາກົນຈີນ-ລາວເລີ່ມຈາກເມືອງຄຸນມິງ ຜ່ານກິ່ງແຂວງສິບສອງພັ່ນນາ,ເມືອງຢູ້ຊີ່,ພູເອີ ແລະ ອື່ນໆຜ່ານດ່ານຊາຍແດນບໍ່ຫານ-ບໍ່ເຕັນລະຫວ່າງສອງປະເທດ ໄປເຖິງນະຄອນຫຼວງວຽງຈັນ ສປປ ລາວ ມີຄວາມຍາວທັງໝົດ 1000 ກິໂລແມັດ ແລະປັດຈຸບັນໄດ້ລົງມືກໍ່ສ້າງຢ່າງຮອບດ້ານແລ້ວ. ໃນນີ້, ທາງລົດໄຟຢູ້ຊີ່-ບໍຫານຍ່ານໃນປະເທດຈີນເປັນທາງລົດໄຟສາກົນສາຍສຳຄັນຂອງຈີນທີ່ເຊື່ອມຕໍ່ລາວແລະໄທ. ຫຼັງສ້າງສຳເລັດແລະເປີດບໍລິການແລ້ວ, ການຂີ່ລົດໄຟຈາກຄຸນມິງໄປເມືອງຊຽງຮຸ່ງກິ່ງແຂວງເຜົ່າລື້ສິບສອງພັ່ນນາຈະໃຊ້ເວລາພຽງ 3 ຊົ່ວໂມງເທົ່ານັ້ນ, ສ່ວນຈາກຄຸນມຄິງຫານະຄອນຫຼວງວຽງຈັນ ສປປ ລາວຄາດວ່າຈະອອກເດີນທາງໃນຕອນແລງແລະໄປຮອດໃນຕອນເຊົ້າຂອງມື້ຕໍ່ມາ.