ລັດຖະສະພາອາເມລິກາຢືນຢັນໃນວັນທີ22ກໍລະກົດນີ້ວ່າ, ສະພາສູງແລະສະພາຕ່ຳຈະຮ່ວມກັນຊຸກຍູ້ໃຫ້ຜ່ານຍັດຕິສະບັບໜຶ່ງເພື່ອຂວ້ຳບາດຕໍ່ຣັດເຊຍ,ອີຣານແລະສປປເກົາຫຼີ. ຖ້າຍັດຕິດັ່ງກ່າວໄດ້ຮັບການຮັບຮອງແລ້ວ, ກໍຈະຖືກຍື່ນໃຫ້ທ່ານໂດນັນ ທຣຳ ປະທານາທິບໍດີອາເມລິກາໄວສຸດໃນທ້າຍເດືອນນີ້.
ໃນຍັດຕິດັ່ງກ່າວນອກຈາກມີເນື້ອໃນກ່ຽວກັບການຂວ້ຳບາດຕໍ່ 3 ປະເທດແລ້ວ, ຍັງໄດ້ຈຳກັດສິດອຳນາດຂອງປະທານາທິບໍດີໃນການຍົກເລີກການຂວ້ຳບາດຕໍ່ຣັດເຊຍ ໂດຍໄດ້ລະບຸວ່າ, ໃນເວລາທີ່ປະທານາທິບໍດີໃຊ້ການກະທຳປ່ຽນແປງອັນສຳຄັນໃນດ້ານນະໂຍບາຍການຕ່າງປະເທດຕໍ່ຣັດເຊຍ ເຊັ່ນ: ຍົກເລີກການຂວ້ຳບາດຕໍ່ຣັດເຊຍ, ຫຼື ສົ່ງຄືນຊັບສິນທາງການທູດທີ່ຖືກອາຍັດໄວ້ແລະອື່ນໆນັ້ນ, ຕ້ອງສະເໜີບົດລາຍງານໃຫ້ລັດຖະສະພາ,ແລະລັດຖະສະພາມີສິດຢັບຢັ້ງຂໍ້ຕົກລົງຂອງປະທານາທິບໍດີ.
ອີງຕາມວາລະເຮັດວຽກ, ສະພາຕ່ຳອາເມລິກາຈະລົງຄະແນນສຽງກ່ຽວກັບຍັດຕິດັ່ງກ່າວໃນວັນທີ25ກໍລະກົດນີ້. ຖ້າຮັບຮອງແລ້ວ, ກໍຈະສົ່ງໃຫ້ສະພາສູງເພື່ອລົງຄະແນນສຽງ. ແລະຍັດຕິທີ່ສອງສະພາລ້ວນແຕ່ຮັບຮອງແລ້ວນັ້ນຈະມອບໃຫ້ແກ່ທ່ານໂດນັນ ທຣຳເພື່ອໃຫ້ທ່ານຕົກລົງວ່າຈະລົງນາມຫຼືບໍ່ເພື່ອໃຫ້ເກີດຜົນສັກສິດແລະກາຍເປັນກົດໝາຍໃນທີ່ສຸດ.
 |
