ທ່ານ ໂຣດຣີໂກ ດູເຕີເຕ ປະທານາທິບໍດີຟິລິບປິນ ໄດ້ຜ່ານບົດລາຍງານການບໍລິຫານປະເທດປະຈຳປີໃນຫົວຂໍ້ "ສ້າງຊີວິດການເປັນຢູ່ທີ່ສະບາຍຂອງປະຊາຊົນທົ່ວປະເທດ" ຢູ່ສະພາແຫ່ງຊາດໃນວັນທີ 24 ກໍລະກົດນີ້ວ່າ, ລັດຖະບານຈະພະຍາຍາມຢ່າງສຸດຂີດໃນການປາບປາມຢາເສບຕິດຈົນປະສົບຜົນສຳເລັດ ພ້ອມທັງສັນຍາວ່າ ຈະເລັ່ງລັດກໍ່ສ້າງເສດຖະກິດ.
ທ່ານ ດູເຕີເຕ ຍັງໄດ້ກ່າວສະແດງຄວາມຂອບໃຈອີກເທື່ອໜຶ່ງທີ່ຈີນໄດ້ສະໜັບສະໜູນແລະຊ່ວຍເຫຼືອການພັດທະນາເສດຖະກິດ ໂດຍສະເພາະການກໍ່ສ້າງພື້ນຖານໂຄງລ່າງຂອງປະເທດຕົນ.
ຂ່າວແຈ້ງວ່າ, ປີນີ້ ຟິລິບປິນໄດ້ວາງແຜນການ "ກໍ່ສ້າງພື້ນຖານໂຄງລ່າງຂະໜາດໃຫຍ່" ໂດຍຈະໃຊ້ງົບປະມານ 178 ຕື້ໂດລາສະຫະລັດແຕ່ປີ 2017-2022. ຫຼັງຈາກຜ່ານບົດລາຍງານການບໍລິຫານປະເທດແລ້ວ, ທ່ານ ດູເຕີເຕ ຍັງໄດ້ປະກາດວ່າ ສົກປີ 2018 ຈະໃຊ້ງົບປະມານປະມານ 79 ຕື້ 861 ລ້ານໂດລາລົງທຶນເຂົ້າໃນຂົງເຂດພື້ນຖານໂຄງລ່າງເປັນຕົ້ນຕໍ.