ອົງການການຄ້າໂລກໄດ້ເປີດເຜີຍບົດລາຍງານໃນວັນທີ 24 ກໍລະກົດນີ້ວ່າ, ນັບແຕ່ກາງເດືອນຕຸລາປີຜ່ານມາຫາກາງເດືອນພຶດສະພາປີນີ້, ສະມາຊິກອົງການຕົນ ໄດ້ເລີ່ມນຳໃຊ້ມາດຕະການຈຳກັດການຄ້າ 74 ຂໍ້ ໂດຍສະເລ່ຍແລ້ວເກືອບ 11 ຂໍ້ຕໍ່ເດືອນ ເຊິ່ງເປັນສະຖິຕິຕ່ຳສຸດນັບແຕ່ເກີດວິກິດການການເງິນປີ 2008 ເປັນຕົ້ນມາ.
ມາດຕະການຈຳກັດການຄ້າປະກອບມີ: ການເພີ່ມຫຼືຍົກສູງພາສີ, ການເພີ່ມຄວາມເຂັ້ມງວດໃນການຕິດຕາມຄຸ້ມຄອງດ່ານພາສີ ແລະການຈຳກັດຈຳນວນເປັນຕົ້ນ.
ບົດລາຍງານຍັງສະແດງໃຫ້ເຫັນວ່າ, ໃນໄລຍະດຽວກັນ, ສະມາຊິກອົງການຕົນໄດ້ປະຕິບັດມາດຕະການສ້າງຄວາມສະດວກດ້ານການຄ້າເພີ່ມຂຶ້ນ 80 ຂໍ້, ເຊິ່ງໄດ້ລວມເອົາທັງການຍົກເລິກຫຼືການຫຼຸດພາສີໃຫ້ຕ່ຳລົງ, ການຮັດກຸມຂັ້ນຕອນຜ່ານດ່ານ ແລະອື່ນໆ ເຊິ່ງສະເລ່ຍແລ້ວມີຫຼາຍກວ່າ 11 ຂໍ້ຕໍ່ເດືອນ ແລະເປັນສະຕິຖິຕ່ຳອັນດັບທີສອງນັບແຕ່ປີ 2008 ເປັນຕົ້ນມາ. ຂະນະດຽວກັນ, ມູນຄ່າການຄ້າທີ່ພົວພັນກັບມາດຕະການສ້າງຄວາມສະດວກນັ້ນ ບັນລຸຫຼາຍກວ່າມູນຄ່າການຄ້າທີ່ພົວພັນກັບມາດຕະການຈຳກັດ 3 ເທົ່າຂຶ້ນໄປ.
ທ່ານ ໂຣເບີໂຕ ອາເຈີເວໂດ ຜູ້ອຳນວຍການໃຫຍ່ອົງການການຄ້າໂລກເຫັນວ່າ, ບົດລາຍງານນີ້ໄດ້ສ່ອງແສງໃຫ້ເຫັນເຖິງຄວາມພະຍາຍາມຂອງສະມາຊິກອົງການຕົນ ເພື່ອປັບປຸງສະພາບແວດລ້ອມດ້ານການຄ້າທົ່ວໂລກໃຫ້ດີຂຶ້ນ.
 |
